Бірнеше күн қатарын жауған жауын-шашын салдарынан Астананы тағы да су басып, кей көшеде көлік қозғалысы шектелді. Премьер-министр Бақытжан Сағынтаев үкімет отырысында осы проблемаға назар аударып, Астана әкімдігіне ескерту жасады. "Бірнеше күн тоқтамай жауған жауын-шашын салдарынан қаланың көркі бұзылды. Жаяу жүргіншілер жолы бүлініп, қоғамдық көліктер еркін қозғала алмады. Осыған байланысты мемлекет басшысы ескерту жасап, жауын-шашын суы кететін құбырларды модернизациялауға қатысты бірқатар тапсырма берді. Қаланың жағдайы үшін әкімдік жауап беретінін барлығымыз жақсы білеміз. Естеріңізге тағы да салайын, осы болып жатқан барлық жайсыз жағдайлар үшін қала жауапты. Адамдар мен қоғамдық көліктер зардап шекпеуі тиіс", — деді Сағынтаев. Сондай-ақ премьер-министр Тұран, Момышұлы және Бараев көшелерінің қатты зардап шеккенін атып өтті.

"Мәселе қаланың көркінде ғана болып отырған жоқ. Бұл әдетке айналып бара жатқан сияқты. Себебі, қаланың белгілі бір бөлігін ғана қайталап су басады. Су автобустардың ішіне де кіріп кеткен екен. Проблемалары көп көшелерде арнайы жұмыс жүргізіп, мұндай оқыс жағдайға алдын ала дайындалу қажет. Мұндай жағдайлардың алдын алу үшін құдықтар мен суағарларды тазартып отыру қажет. Өткен аптада сіз Астананы дамытуға қатысты кешенді жоспарды ұсындыңыз. Сол жоспарды жүзеге асырған кезде құбырлар мен суағарларға ерекше назар аударуға тиіссіз", — деді премьер-министр қала әкімі Әсет Исекешевке.

Естеріңізге сала кетсек, тамыздың 20-сынан 21-не қараған түні Астанада қатты жаңбыр жауған болатын. Соның салдарынан қаланың барлық коммуналдық қызметі қарқынды түрде жұмыс істеді.