Мүгедек баланы қинап өлтірген келіншекке қатысты соты өтті деп KYN.KZ КТК арнасына сілтеме жасай отырып хабарлайды. Жеткіншектің өлімі үшін күтуші жалғыз жауап бермейтін болды! Мүгедек баланың мәйіті шыққан Талғардағы балалар интернаты қызметкерлеріне  қатысты қылмыстық іс қозғау туралы адвокаттың өтінішін судья бүгін мақұлдады. Өйткені, тәрбиешілердің жаппай жабық мекемедегі жарымжан балаларды ұрып-соғады деген күдік бар. Ал 8 жасар Мұхамеджанды байлап өлтірді делінген күтушіге мемлекеттік айыптаушылар бақандай 15 жыл сұрады. Ал жалғыз ұлынан айырылған ата-ана әйелден 30 миллион теңге талап етті Мүгедек баланың өліміне қатысты процеске қатысқандар сот залына емес, қорқынышты киноға келгендей болды. Өйткені, интернатта болған түн ішіндегі жағдай экранда көрсетілді. Мұхамеджанды қалай байлағанын бүге-шүгесіне дейін күдіктінің есінде. Қуыршақты жаялықпен мойнынан бұрап, төсектің иін теміріне таңып тастаған келіншек, баланы шұлықпен төсекке қалай байлағанын да көрсетіп берген. Алайда, көп ұзамай ол сөзінен таңып, тек қолынан ғана орадым деп отыр.  Дегенмен сот сарапшысы баланың мойнынан қылқынып қалғанын растады. Одан басқа, мәйіттен ұрып-соққан іздер анықталған. «Оны ұрмадым», - деп сотта көз жасын көлдеткен келіншек бұл жолы мекемедегі сұмдықты жайып салды. Ал ауру балаларды төсекке таңып тыныштандыруды әріптестері үйретіпті. Азапты әдістер мұнымен бітпейді екен. Жалымова жылап қоймаған балақайларға жындыхана көйлегін кигізетіндерін де айтты. Мұны естіген директордың төбе шашы тік тұрды. Асхат Қожамқұлов, «Аяла» Талғар арнаулы әлеуметтік қызмет көрсету орталығы директоры: «Мен істегелі бері 2 жыл болды.  "Өлім көйлегі" дегенді естімедім. Қызметтік ережені қарауыңызға болады. Ондай бір сөз жоқ.», - деп отыр. Басшының бұл сөзін тәрбиешісі тура сот залында жоққа шығарды. Мейіргүл Жалымова, сотталушы: «Мен көргенмін сол баланың сөйтіп жататынын.  Түнде жататын кезде байлап қоятын», - деп айтты. Жалпы, интернаттағы дауға байланысты тағы да іс қозғалатын болды. Ал баласын емдеуге беріп, мәйітін алып қайтқан ана күдіктіден 30 миллион теңге талап етті. Ал мемлекеттік айыптаушы болса, әйелді 15 жылға бас бостандығынан айыруды сұрады. Прокурордың бұл өтініші сотталушының өзін де, туыстарын да есеңгіретін тастады. «Мама, мені кешірші! Мен мұндай болады деп ойламадым, мама! Кешірші! 3 қызым аманат, мама, мен қылмыстық іс жасамадым, мама!», - деп көз жасын төкті айыпталушы. Айта кетейік күдіктінің өзінің де үш баласы бар. Үкім екі күннен кейін белгілі болады.