19 ақпан күні сағат 14:00 шамасында СҚО Айыртау ауданының полиция бөлімшесіне Янко бекетінен Ғ.Мүсірепов ауданы Жаңасу ауылына қарай 45 жастағы ер адамның кеткені туралы хабарлама келіп түсті, деп хабарлайды KYN.KZ polisia.kz-ке сілтеме жасап. «Полиция қызметкерлері, құтқарушылар, еріктілер мен жергілікті тұрғындар арасынан іздеу іс-шараларын өткізу бойынша үш жедел-іздестіру тобы құрылды. Сыйымдылығы үлкен көлік пайдаланылды. Тағы бір топ атпен жүрді», - деп мәлімдеді полиция. 20 ақпан күні Жаңасу ауылынан 3 шақырым жерде жоғалған ер адамның қар басқан денесі табылды. Мәйіттің денесінде зорлықпен өлтіру белгісі жоқ. Адам өлімінің нақты себебі медициналық сараптама нәтижелері бойынша анықталады. Процедуралық тексеру жүргізіліп жатыр.