Айгүл Иманбаева күйеуімен ажырасып, ұлына бұл жағдайды түсіндіру жолында қиындықтар болғанын жасырмады. Актриса ұлы ес білген сәтте әкесінің үйіне барып, өзін бөтен сезініп, жылап келген кездерді еске алып "Өмірдің өзі" бағдарламасында баяндап берді, деп жазды КҮН.КЗ тілшісі. Бұл туралы Айгүл Иманбаева ұлы асылжан Сәбитұлымен болған сұхбатта әңгімелеп берді. "Мен әкем мен шешемнің тағдырын қайталадым ғой. Сол ұлыма өтпесін дедім. Бір жерлерде қателік жіберіп, өтіп кеткенін білемін. Бірақ, сол тамыр қуалап кетпесе екен, балам қазір шешіп алса екен деп, әкем мен шешем жіберген қателікті жасамауға тырыстым. Қызғанбауға тырыстым. Әкеңмен араласқаныңды қаладым. Қайта-қайта жіберіп тұрдым. Кезінде сен қанша қаламағанмен де, Алтынай (Жорабаева - ред.) мен Сәбит (Әбдіхалықов - ред.) бірге тұрып жүргенде жібердім. Бала кезде "Алтынай тәте жақтырмайды" деп барғың келмей жылап келетінсің. Сонда да әкеңе сені жақындата беруім - менің жеңісім сияқты көрінеді. Өйткені, менің жүрегім тыныш, балам әкесіз емес. Қанша жерден екеуі екі бөлек кетсін, үйленсін, күйеуге тисін, мәселе онда емес. Мәселе, сол әке мен шешенің кіндігінен шыққан баланың психикасын бұзбай, дер кезінде тоқтатып, дер кезінде екеуімен де араласуында. Санаң, ақылың, өрең жетіп тұрғаннан кейін, осы нәрсеге тыныш жағдайда қарау керек. Аралассын, неге араласпайды? Неге бармайды? Неге көмектеспейді? Басқа анадан туған бауырларын тартпайды? Мұның барлығы мен үшін қалыпты, өзінше әдемі картина", - деді Айгүл Иманбаева.