Стихиялық қоқыс үйінділерінің санын азайта алмаған шенеуніктерге сөгіс жарияланады. Премьер-министр Әлихан Смайылов осындай тапсырма берді.

Смайылов биыл қыркүйекте өткен үкімет отырысында стихиялық қоқыс үйінділерін азайту бойынша бірқатар тапсырма берілгенін еске салды.

"Оның ішінде стихиялық қоқыстардың санын 2 есеге қысқарту мәселесін көтердік. Жалпы, өңірлерде тиісті жұмыстар жүріп жатыр. Алайда Ұлытау, Алматы және Маңғыстау облыстары ең төмен нәтиже көрсетіп отыр. Аталған өңір әкімдеріне осы салаға жетекшілік жасайтын орынбасарларына қатаң сөгіс жариялауды тапсырамын", – деді премьер үкімет отырысында.

Сондай-ақ, оның айтуынша, аудандар мен қалалардың 75%-і коммуналдық қалдықтарды реттеу бағдарламасын әзірлеуге әлі кіріспеген. Ал мерзім әлдеқашан өтіп кетті.

"Мысалы, Батыс Қазақстан, Солтүстік Қазақстан, Түркістан облыстарында және тағы да сол Маңғыстау облысында бірде-бір жоспар әзірленбеген. Сондықтан осы өңір әкімдері де өздерінің осы салаға жетекшілік ететін орынбасарларына тапсырманы орындамағаны үшін сөгіс жарияласын. Енді бұл процесті әкімдердің өздері жеке бақылауда ұстауы тиіс", – деді Смайылов.

Айтуынша, экология министрлігі сатып алу рәсімдеріне байланысты мерзімді келесі жылдың ортасына дейін ұзартуды сұрап отыр. Егер жұмыстар 1 сәуірге дейін аяқталмаса, тиісті тәртіптік шаралар қабылданады, деп ескертті үкімет басшысы.

Смайыловтың пікірінше, стихиялық қоқыстарды болдырмау, экологиялық мәдениетті қалыптастыру бойынша жұмысты қайта қарау қажет.

Халықаралық тәжірибе көрсетіп отырғандай, дамыған елдер ең алдымен, қалдықтарды қайта өңдейтін инфрақұрылымды ретке келтіріп алады.

"Бұл жерде өндірушілердің кеңейтілген міндеттемелерінің механизмін белсенді түрде қолдану керек. Қалдықтарды сұрыптау және оларды кәдеге жаратудың нақты жүйесін құрған жөн. Мұның барлығын халық арасында түсіндіру жұмыстарын күшейте отырып, жүргізу қажет", – деді премьер-министр.

Сондай-ақ ол Экологиялық білім беру мен тәрбиелеу жөніндегі 2029 жылға дейінгі іс-шаралар жоспарының уақытылы және сапалы орындалуын қамтамасыз етуді тапсырды.