Наразылықтың 11-күні жасы елуден асқан Қонысбай Өтеповтің қан қысымы түсіп, ауруханаға жеткізілген, деп хабарлайды KYN.KZ.

Өтеповпен қатар тағы бір жұмысшы қан қысымы көтеріліп, ауруханаға жатқызылды. Наразылардың айтуынша, Жетібайда жағдай еш өзгермеген. Олар талаптары орындалғанша наразылықты тоқтатпайтынын айтты.

Жетібайда West Oil Software компаниясының 500-ге тарта жұмысшысы 11 желтоқсаннан бері ереуілдетіп жатыр. Олар жұмысты тоқтатқанын хабарлап, өздерін "ҚазМұнайГазға» қосуды сұрады. Әрі бірыңғай еңбекақы талап етті. 13 желтоқсанда компания 7 адамды жұмыстан шығарды. Ал «ҚазМұнайГаз» төрағасы Мағзұм Мирзағалиев сервистік компания қызметкерлерін «ҚазМұнайГаз» штатына алу мүмкін емес деп хабарлады.