Ақтөбе облысы Алға ауданында жастар төбелесіп қалды. Үш жігіт ауруханаға жеткізіліп, біреуі ем алып жатыр, деп хабарлайды KYN.KZ тілшісі КТК телеарнасына сілтеме жасап.
«Салдарынан үш жігіт медициналық мекемеге жеткізілді. Күдікті ұсталып, қамауға алынды. «Бұзақылық» фактісі бойынша сотқа дейінгі тергеп-тексеру жүргізіліп жатыр», - деп хабарлады Ақтөбе облыстық ПД баспасөз қызметінің жетекшісі Ерболат Сарқұлов.
Тергеу құпиялылығына сүйенген полиция қызметі өзге ақпаратты таратпады.  Ақтөбе облыстық денсаулық сақтау басқармасы баспасөз қызметінің хабарлауынша, сол күні 15 жастағы бозбала пышақ жарақатымен ауруханаға түскен. 
«Алға аудандық ауруханасының қабылдау бөлімініне 15 жастағы тұрғын жеткізілді. Оны реаниматолог, хирург қарап шықты. Басын, кеуде тұсын, іш құрылысын КТ-ға түсіріп, тексеруден өткізді. Ол аурухананың хирургия бөліміне жатқызылды. Алдымен жарақаты тігіліп, таңылды. Қазір науқас ем қабылдап жатыр. Ал бүгін рентгенге түсірді. Ауыр жарақаты жоқ, отаны қажет етпеді. Науқастың жағдайы тұрақты», - деп хабарлады Ақтөбе облыстық денсаулық сақтау басқармасы баспасөз қызметі.

ktk.kz сайтының материалдарын пайдалану Материалды мәтіннің бірінші немесе екінші сөйлемінде негізгі мәтін ретінде бір шрифтпен орналастырылуы тиіс материалға тікелей гиперсілтеме болған кезде рұқсат етіледі.