Алматыда өлтірілген Аль-Бейне Зарипованың отбасы оның өліміне қатысты істі "ерекше қатыгездікпен жасалған кісі өлтіру" деп қайта саралауды талап етуде6 деп хабарлайды KYN.KZ ақпарат агенттігі.

Аль-Бейненің анасы Зарипованың күйеуін «Кісі өлтіру» бабымен соттап жатқанына келіспейтінін айтады.

Бастапқыда іс Қылмыстық кодекстің 99-бабының 1-бөлігі бойынша – "Кісі өлтіру" деп сараланып, сотқа жіберілген.

"Алайда, біз бұл жай ғана кісі өлтіру емес, Аль-Бейнеге жасалған азаптау және қорлаумен ерекше қатыгездікпен жасалған кісі өлтіру деп есептейміз. Бұл туралы біз 18 қыркүйекте сотқа өтініш беруге ниеттіміз. Өлімнің алдында қызым ұзақ жылдар бойғы отбасылық зорлық-зомбылықтан кейін ажырасқысы келген болатын", – деді қыздың анасы Мағжан Жүсіпова.

Оның айтуынша, Сабыржан Зариповтың тарапынан зорлық-зомбылық пен толық бақылау фактілері куәгерлермен бірнеше рет расталған, соның ішінде себепсіз қызғаныш шабуылдары, соның салдарынан Аль-Бейне жақындарымен және құрбыларымен күйеуінен жасырынып сөйлесуге мәжбүр болған.

"Зарипов Аль-Бейненің онымен ажырасып, мүлікті бөліскісі келетінін білгенде, қызымды өлтіруге қылмыстық жоспар құрған деп есептеймін. (...) Сараптамаға сәйкес, айыпталушы мен Аль-Бейненің арасында жыныстық қатынас болған. Біз Зарипов Аль-Бейнені зорлап, оны өлім алдында одан әрі қорлап, мазақ еткеніне сенімдіміз", – деп қосты Жүсіпова.

Аль-Бейненің анасы қызының соңғы айларда Сабыржан Зариповпен кез келген байланысты үзуге тырысқанын, сондықтан олардың арасында интимдік қатынастар болуы мүмкін емес екенін айтты.

"Полиция Аль-Бейненің жатын бөлмесінің жанындағы жуынатын бөлмені тексергенде, ваннаның суық сумен толтырылғанын және жанында медициналық жгуттардың жатқанын анықтады. Куәгерлердің бірі Зариповтың өзін-өзі өлтіру нұсқасын жоққа шығарғанын растады. Біз Зариповтың Аль-Бейнені күштеп суға батыру арқылы қосымша азаптауды жоспарлағанына сенімдіміз. Бұрын куәгерлердің бірі Аль-Бейненің Зариповтың оны мұздай душқа күштеп кіргізгенін айтып шағымданғанын растаған болатын", – деп қосты қыздың анасы.

Әйел қызының үстінен жасалған қатыгез әрекеттер туралы да айтты. Этикалық себептерге байланысты біз мәліметтерді келтірмейміз. Кейбір деректер бойынша, қыз өмірлік маңызды органдарға пышақ жарақаттарынан қайтыс болған.

"Қорғаушы тарап Зариповтың қылмысты аффект жағдайында жасағанын, Аль-Бейненің қызғаныш тудырғаны үшін оны өлтіргенін айтуда. Алайда, біз Зарипов Аль-Бейнеге сатқындық жасады деп жала жауып, психологиялық зорлық-зомбылық пен қорлауға әдейі ұшыратқан деп есептейміз. Біз Зариповтың Аль-Бейненің ар-намысы мен қадір-қасиетін қорлай отырып, алдын ала жоспарланған қатыгез қылмысты салқынқандылықпен жасағанына сенімдіміз", – деп мәлімдеді әйел.

Аль-Бейненің отбасы прокуратурадан жаңа айыптау актісін құрып, айыпталушыға ерекше қатыгездікпен жасалған кісі өлтіру фактісі бойынша айып тағуды сұрайды.