Мәжіліс депутаты Ермұрат Бәпи мәселені атүсті қарамай, тереңге бойлай түсу керек деген пікірде. Бас прокурор Берік Асыловқа жолдаған депутаттық сауалында ол танымал маркет плейстерде мұндай араб қарпімен жазылған дүниелердің самсап тұрғанын айтты, деп хабарлайды KYN.KZ ақпарат агенттігі КТК жаңалықтарына сілтеме жасап.

«Ел туын бүлдіру арқылы жат пиғылды дәріптемек болған бұл төрт қыз әлдебір арандатушы топтың құрбаны болуы мүмкін. Олар жастық алаңғасырлықпен, әлде материалдық қызығушылықпен немесе діни сауатсыздықпен істеген. Бұл өрескел заңбұзушылықтың тасасында тұрған әлдебір кереғар күштер бар сияқты. Әкімшілік тұрғыдағы жазасын алған төрт қыздан бұрын, осы қылмысты әрекетті ұйымдастырушылар жазаға тартылуға тиіс», - деді Мәжіліс депутаты Ермұрат Бәпи.

5 мың теңгеге ашық сатылып жатқан түр-түсі бұрмаланған туды қазір сатушылар өз интернет дүкендерінен алып тастаған. Бірақ депутат у-шу басылған соң, мұндай саудагерлердің қайта төбе көрсетпесіне «кім кепіл» деп отыр.

Жалпы халық қалаулысының пікірінше, бұл оқиғаның арандатушылық мазмұны мен мемлекеттік тудың бетінде қолданылған символика сипаты алдын ала жоспарланған, әлдебір топтың қасақана ұйымдастырылған тірлігі екенін көрсетеді.

Еске сала кетсек, бұған дейін әлеуметтік желіде Қазақстанның жалауына араб қаріптерін жазып, сұқ саусағын көрсетіп суретке түскен төрт қызға қатысты сот шешімі шықты. Сот бұл қыздардың әрекетін «ұсақ бұзақылық» деп танып, біреуін 15 тәулікке қамап, екінші қызға 78 640 теңге көлемінде айыппұл салды. Ал кәмелетке толмаған екі қыздың ата-анасы да 39 мың теңге айыппұл төлейді.