Ресей Президенті православие Пасхасы кезінде барлық ұрыс қимылдарын тоқтатуға өкім етті, деп хабарлайды KYN.KZ  ақпарат агенттігі Orda.kz сайтына сілтеме жасап

Бұл туралы Кремльде РФ ҚК Бас штабының бастығымен болған кездесуінен кейін мәлім болды.

Келісім Мәскеу уақыты бойынша 18: 00-ден бастап, 21 сәуірде 00: 00-ге дейін жалғасады.

«Оқ атуды тоқтату режимі гуманитарлық мақсатта енгізіледі және Киев тарапы келісімді сақтаған жағдайда ресейлік Біріккен әскер тобы да келісімді бұзбайды» деп жазылған хабарламада.

Зеленскийдің айтуынша, Украина шынымен де бітімгершілікті Ресей тарапы сақтаған жағдайда оқ атуды тоқтатады. Украина басшысы бітімді тек пасхалық демалыс күндерімен шектемеуді ұсынды.

«Егер шынымен де тыныштық орнаса, Украина оны 20 сәуірдегі Пасха күні аяқталғаннан кейін де ұзартуды ұсынады. Бұл Ресейдің шынайы ниетін көрсетеді, себебі тақырыпты талқылау үшін 30 сағат жеткілікті шығар, бірақ сенімді нығайтуда нағыз шаралар қажет. Отыз күн әлемге мүмкіндік береді», - деп атап өтті Зеленский.

Ол бұған дейін АҚШ екі тарапқа да 30 күн мерзімге толық оқ атуды тоқтату туралы келісім жасасуды ұсынғанын еске салды. Украина бұл шартқа 11 наурызда Джидда қаласында келіскен, бірақ Зеленскийдің айтуынша, Ресей бұл ұсынысқа 39 күн бойы жауап қатпаған.

Бұл ретте Зеленский майдандағы жағдай шиеленіскен күйінде қалып отырғанын атап өтті. ӘҚК Бас қолбасшысының баяндамасы бойынша бірқатар бағыттарда Ресей тарапынан шабуыл әрекеттері жалғасуда, артиллерия жұмысы тоқтамады.

«Әзірге Мәскеудің сөзіне сенім жоқ. Біз Кремльдің қалай айла-шарғы жасайтынын жақсы білеміз. Бірақ тыныштық сақталса, Украина оны қолдайды. Қорғаныс күштері ұтымды әрекет етеді, дегенмен әрбір шабуылға жауап беруге дайынбыз», - деп қортындылады Зеленский. 

ВВС басылымы оқ атуды тоқтату туралы бұйрықпен бірге украиндық әскерилерге бітімгершілікті бұзудың барлық жағдайларын тіркеуге - фото және бейне айғақтар жинауға нұсқау берілгенін жазды.