Шымкент жұқпалы аурулар ауруханасының дәлізінде емделушілер, оның ішінде балалы әйелдің жатқаны жайлы видео әлеуметтік желіде резонанс тудырды. Әкімдік мекемедегі күрделі жөндеу жұмыстарына байланысты уақытша қиындық туындағанын мәлімдеді, деп хабарлайды KYN.KZ ақпарат агенттігі Otyrar басылымына сілтеме жасап.

Аурухананың он бөлімшесінің сегізі тәулік бойы жұмыс істеп, қауіпті жұқпалы ауруларды жұқтырған науқастарды қабылдап жатыр.

Әкімшіліктің мәліметінше палаталар 2-4 төсекке есептелген және бөлек жуынатын бөлмелермен, желдету жүйелерімен жабдықталған. Пациенттер жаппай түскен жағдайда санитарлық ережелерге сәйкес дәліздерге уақытша орналастыруға рұқсат етіледі және Денсаулық сақтау министрлігінің бұйрықтарымен реттеледі.

Тексеру барысында санитарлық талаптар мен медициналық этика нормаларының бұзылуы анықталған жоқ. Науқастар үнемі бақылауда, ал сауығып кеткендер амбулаторлық емге ауыстырылып жатыр.

Әкімдік эпидемиологиялық жағдайдың бақылауда екенін, медицина қызметкерлерінің барлық іс-әрекеті белгіленген стандарттарға сай екенін атап өтті.