Қазақстанда шамамен 208 мың адам арнайы мемлекеттік жәрдемақы алады Ай сайын бұл төлемдерге республикалық бюджеттен 22,3 миллиард теңге бөлінеді, деп хабарлайды KYN.KZ ақпарат агенттігі.

Еңбек және халықты әлеуметтік қорғау министрлігінің мәліметінше, арнайы мемлекеттік жәрдемақыны 17 санаттағы азаматтар рәсімдей алады.

Кімдер жәрдемақы ала алады:

•        Ұлы Отан соғысының және басқа елдердегі жауынгерлік іс-қимылдарға қатысқан ардагерлер;

•        ҰОС ардагерлеріне жеңілдіктер бойынша теңестірілген адамдар;

•        қаза тапқан әскери қызметкерлердің жесірлері;

•        қаза тапқан әскери қызметкерлердің отбасылары;

•        тыл еңбеккерлері;

•        Чернобыль АЭС апатының зардаптарын жоюға қатысқандар;

•        саяси қуғын-сүргін құрбандары, егер мүгедектігі немесе зейнеткерлік статусы болса;

•        «Халық қаһарманы» және «Қазақстанның Еңбек Ері» атағының иегерлері;

•        мемлекет алдында ерекше еңбегі үшін зейнетақы алатын адамдар.

Қазақстанда тұрақты тұратын шетелдіктер мен азаматтығы жоқ адамдар да бұл төлемге үміткер бола алады.

Жәрдемақы мөлшері алушының санатына байланысты және 2,13-тен 138,63 айлық есептік көрсеткішке (АЕК) дейін. Бұл 8375 теңгеден 545 мың теңгеге дейінгі сома. Министрлік мәліметінше, соңғысы — 2025 жылғы ең жоғарғы мөлшер. Төлемдер АЕК көлемі артқан сайын жыл сайын өсіп отырады.

Егер адам бірден бірнеше санатқа жатса, ол жәрдемақыны қай санат бойынша алатынын өзі таңдайды.

Өтініш онлайн — электрондық үкімет порталы eGov.kz арқылы және офлайн — халыққа қызмет көрсету орталықтарында (ХҚКО) барып беруге болады.