Пайдаланушылар банк қаражатқа қолжетімділікті шектеп, жоғары комиссиялар ұстайды деп мәлімдеуде. Алайда қаржы ұйымы бұл мәліметтерді жоққа шығарды, деп хабарлайды KYN.KZ тілшісі.

Атап айтқанда, Threads желісінде банк кейбір клиенттердің шоттарын бұғаттап, интернет-банкингті өшіріп, қаражатты тек кеңсеге барып қана алуға болады деген хабарламалар пайда болған.

Сондай-ақ, банк қаражатты шешіп алуға жол бермеу үшін ай сайын қолма-қол ақша сомасының 50%-на дейін комиссия енгізеді, соның салдарынан шоттар «нөлге түседі» деген де пікірлер айтылған.

Банктің ресми ұстанымы

Bereke Bank өкілдері өз қызметін Қазақстан заңнамасына қатаң сәйкестікте жүргізетінін және «шоттарды нөлге түсіру» тәжірибесін қолданбайтынын мәлімдеді.

«Жекелеген жағдайларда резиденттер мен резидент еместердің шектеулі тобына стандартты қауіпсіздік шаралары қолданылуы мүмкін. Бұл шаралар нүктелік әрі алдын алу сипатында болып, операциялардың тұрақтылығын қамтамасыз етуге және клиенттердің мүддесін қорғауға бағытталған», – деп хабарлады банк.

Ұйымда банк пайдасына қаражаттың есептен шығарылуы туралы ақпарат шындыққа сәйкес келмейтіні атап өтілді.

«Банк шоттарды “нөлге түсірмейді” және шектеулерден пайда таппайды. Егер іскерлік қатынастар тоқтатылса, қаражатты қайтаруды техникалық тұрғыда қамтамасыз ету үшін арнайы шотқа аударылады. Ұсталған барлық комиссиялар қайтарымды болып табылады», – деді Bereke Bank.

Қаражатты қалай қайтаруға болады

Банк түсіндіргендей, клиент сәйкестендіру рәсімінен өткеннен кейін кез келген уақытта өз қаражатын ала алады.

«Қызмет көрсету тоқтатылған жағдайда клиент банк кеңсесіне барып, верификациядан өте алады. Бұл қаражаттың алаяққа емес, нақты иесіне берілетініне кепіл болады және барлық соманы толық көлемде кез келген басқа банкке аударуға мүмкіндік береді», – деді қаржы ұйымы.

Bereke Bank барлық клиенттерге – Қазақстан резиденттері мен резидент еместерге – бірдей талаптар қойылатынын да атап өтті.

«Біз сіздің қаржыңыздың ашықтығы мен қауіпсіздігі үшін жұмыс істейміз», – деп қорытындылады банк.

Осылайша, Bereke Bank шоттардың «нөлге түсірілуі» туралы ақпаратты жоққа шығарып, шектеулерден пайда көрмейтінін мәлімдеді. Банк өкілдерінің айтуынша, ықтимал бұғаттаулар қауіпсіздік шараларымен байланысты, ал клиенттердің барлық қаражаты сақталады және жеке верификациядан кейін қайтарылады.