Қазақстанның Денсаулық сақтау министрлігі жазғы сауықтыру маусымы қарсаңында балалардың қала сыртындағы лагерьлеріне бақылауды күшейтетінін мәлімдеді. Тексерулер алдын ала ескертусіз жүргізіледі, деп хабарлайды KYN.KZ ақпарат агенттігі.

Әкімдіктердің мәліметінше, алдағы маусымда 179 балалар лагері жұмыс істейді, тағы 20-сы жыл бойы ашық. Денсаулық сақтау министрлігінің атап өтуінше, лагерьлер аумақ пен ғимараттарды алдын ала дайындап, санитариялық-эпидемиологиялық қорытынды алуы, медициналық қызмет көрсетуді қамтамасыз етуі және белгіленген сыйымдылықтан аспауы тиіс.

Міндетті талаптардың қатарында:

– қоршалған аумақ;

– үздіксіз сумен жабдықтау;

– кәріз жүйесі;

– жарықтандыру және желдету;

– рұқсат етілген дезинфекциялық құралдармен күнделікті тазалау;

– бес мезгіл тамақтандыру;

– медициналық қызмет көрсету.

Сондай-ақ мамандар шомылу орындарын ерекше бақылауға алады. Су айдындары мен бассейндерде су мен топырақтан сынамалар тұрақты түрде алынып отырады.

Жылдың екінші жартысында Денсаулық сақтау министрлігі мемлекеттік бюджеттен қаржыландырылатын барлық балаларды сауықтыру ұйымдарын тексереді. Олар мемлекеттік бақылаудың ерекше тәртібі аясында қаралады.

Алғаш рет ведомство бекітілген тізімдер бойынша жоспарлы тексерулер механизмін енгізіп отыр. Бұл тізімдер 10 мамырға дейін Санитариялық-эпидемиологиялық бақылау комитетінің аумақтық бөлімшелерінің сайттарында жариялануы тиіс.

Сонымен қатар, жоспарлы тексерулер тізіміне енбеген нысандар да тексеріледі. Мұндай тексерулер алдын ала ескертусіз жүргізіледі.