Атырауда тұтас бір отбасының өліміне қатысты сот процесі басталды. Прокурорлар сотталушы Сұлтан Сәрсемәлиевке қандай айып тағылғанын оқыды, деп хабарлайды KYN.KZ ақпарат агенттігі.

Бір отбасы мүшелері әртүрлі уақытта өлтірілген. Наурыз Мұқанғалиев өлімі дерегі бойынша қылмыс 2025 жылғы мамырда жасалған. Тергеушілер оның денесі ұзақ уақыт бойы жер астында жатқанын анықтады.

Іс материалдарына сәйкес, Сұлтан Сәрсемалиев қылмыс ізін жасыру үшін мәйітті өзі жалға алған Геолог кентіндегі үйдің ауласына көмген.

"Қылмыс жасағаннан кейін Сәрсемалиев кездейсоқ куәгерлер болмас үшін күн батқанша күтуді ұйғарған. Түн ортасы шамасында үйінің ауласының оңтүстік бөлігінен шұңқыр қаза бастаған. Мәйітті ғимарат қабырғасының іргетасынан небәрі 60 сантиметр қашықтықта жерлеген. Түнгі сағат үшке қарай күдікті тереңдігі шамамен бір метр, ені 80 сантиметр болатын көр қазып біткен", - деді прокурор сот отырысында істің мән-жайын баяндау кезінде.

Прокурор айыптау актісін оқу барысында Сәрсемалиев қылмыс жасағаннан кейін марқұмның жеке заттарын алып, оның жеке куәлігін, банк картасын, ұялы телефонын және қолма-қол ақшасын иемденген.

"Сот-медициналық сараптама қорытындысына сәйкес, Наурыз Мұқанғалиевтің денесі жер астында 6 айдан 8 айға дейінгі уақыт аралығында жатқан. Осы уақыт ішінде тіндерде айқын шіру өзгерістері басталып, бұл алғашқы зерттеу кезінде өлімнің нақты себебін анықтауды айтарлықтай қиындатты", - деп мәлімдеді.

Содан кейін Сәрсемалиев үйді мұқият жуып, қан іздерін кетірген. Қылмыс құралы - ас үй пышағын, сондай-ақ Наурыз Мұқанғалиевтің денесі оралған кілемді үйдің қарама-қарсы бетіндегі қоқыс полигонына апарып, толығымен өртеп жіберген.

Жауап алу кезінде сотталушы Сұлтан Сәрсемәлиев өз кінәсін ішінара мойындады. Ол Наурыз Мұқанғалиевті қасақана өлтіру туралы айыпты жоққа шығарды. Оның нұсқасы бойынша өлім абайсыздан болған және ол өзін-өзі қорғау үшін әрекет еткен.