Филиппиндерде 8 маусымға қараған түні оңтүстігіндегі Минданао аймағында магнитудасы 7,8 болатын жер сілкінісі болды, деп хабарлайды KYN.KZ ақпарат агенттігі Reuters агенттігіне сілтеме жасап.

Жер сілкінісінің ошағы Минданао аралының ең оңтүстігіндегі Сарангани провинциясына қарасты Генерал-Сантос қаласының жағалауында орналасқан.

Әлеуметтік желіде жер асты дүмпуінің салдары жарияланды.

Германияның геофизикалық ғылымдар зерттеу орталығының (GFZ) мәліметінше, жер сілкінісі 10 шақырым тереңдікте болған. Филиппин мен көршілес Индонезияның геофизикалық агенттіктері цунами қаупі туралы ескерту жасады. Екі елде де әзірге ғимараттардың қирауы туралы ақпарат түскен жоқ.

Бастапқыда GFZ жер сілкінісінің магнитудасын 8,2 деп бағалаған. Филиппиндік Phivolcs агенттігі магнитуданың 7,0 болғанын хабарлап, ықтимал қираулар мен бір метрден асатын және бірнеше сағатқа созылуы мүмкін цунами туралы ескертті.

Индонезияның BMKG метеорологиялық қызметі жер сілкінісінің магнитудасын 7,7 деп бағалады.

"Бұл біз бастан өткерген ең жойқын жер сілкінісі", - деді Сарангани провинциясындағы Алабель қаласының полиция бастығы Бенджи Анчета.

Цунами қаупіне байланысты ескерту жарияланып, жағалау маңындағы аудандардың тұрғындарына эвакуациялану туралы үндеу жасалды.

Филиппин президенті Фердинанд Ромуальдес Маркос барлық тиісті мемлекеттік органдарға тұрғындарды эвакуациялау және құтқару жұмыстарын дереу бастау жөнінде тапсырма берген.

Полицияның мәліметінше, әзірге қаза тапқандар немесе зардап шеккендер туралы ақпарат түскен жоқ.