Алматы облысында құтқарушылар 58 адамды эвакуациялады, деп хабарлады ТЖМ. 

Нөсер жауын-шашын салдарынан Түрген шатқалындағы Түрген өзенінде су деңгейі күрт көтеріліп, соның салдарынан Түрген - Ассы автожолының жекелеген учаскелерін су шайып кетті.

"Су басқан аймақта 17 киіз үй орналасқан. Сонымен қатар, "Водник" бау-бақша серіктестігіндегі төрт аула аумағын су басты", - деп жазылған хабарламада.

Қауіпсіздікті қамтамасыз ету мақсатында құтқарушылар 58 адамды, оның ішінде 21 баланы және 8 шетел азаматын эвакуациялады. Зардап шеккендер жоқ.

Оқиға орнында құтқарушылар тәулік бойы жұмыс істеп жатыр, сел қаупі бар жағдайға мониторинг жүргізіліп, авариялық-қалпына келтіру жұмыстары атқарылды.

Салдарды жою жұмыстарына 300-ге жуық қызметкер мен 44 техника жұмылдырылды.