Партиялық тізімдер мен партиялар басшылығындағы өзгерістерге қарасақ, Қазақстанның саяси кеңістігі біртіндеп өзгеріп келе жатқаны байқалады. Ұзақ жылдар бойы ескі, іс жүзінде қатып қалған жүйемен байланыстырылып келген саяси ауыр салмақтылардың орнына жаңа тұлғалар келіп жатыр.

Олардың кейбірі мұндай шешімді өз еркімен қабылдап отыр. Шамамен 15 жыл бойы «Ақ жол» партиясын басқарған Азат Перуашев партия төрағасы өкілеттігін тоқтатты. Ал ескі саяси формацияның өкілі Ермұхамет Ертісбаев та Қазақстан халық партиясы басшысы қызметінен кетті.

Алайда партия көшбасшыларының ауысуы саяси жүйенің шынайы жаңарғанын білдіре ме, әлде әзірге тек оның бет-бейнесі ғана өзгеріп жатыр ма?