Бастамашыл топ бүгінде азаматтық қоғамның, бұқаралық ақпарат құралдарының және қоғам белсенділерінің 50-ден астам өкілін біріктірді. Дауыс беру күніне дейін Штаб құрамын және өңірлердегі өкілдігін одан әрі кеңейту жоспарланып отыр.

Штабты Қоғамдық коммуникациялар орталығының басшысы Рафаэль Гасанов басқарады. Алматы Штаб жұмысының және өңірлермен өзара іс-қимылдың негізгі орталық алаңына айналады. 23 тамызда мұнда өңірлерден тікелей қосылымдар ұйымдастырылып, БАҚ-пен жедел жұмыс жүргізетін ақпараттық орталық құрылады.

Қоғам белсендісі, жазушы Бекнұр Кисиков объективті қоғамдық бақылаудың, саяси бейтараптық пен заңнаманы сақтаудың маңыздылығына назар аударды.

Алматы қаласы Қоғамдық кеңесінің мүшесі Андрей Андреев таратылатын ақпаратқа жауапкершілікпен қарау қажеттігін және болжамды заң бұзушылықтар туралы расталмаған мәліметтерді анықталған факт ретінде ұсынуға жол бермеу керектігін атап өтті.

Дауыс беру күніне дейін Штаб өңірлермен жұмысты жалғастырып, азаматтық қоғам өкілдерінің, байқаушылар мен БАҚ өкілдерінің қатысуымен кездесулер мен брифингтер өткізеді.

Еске салайық, мұндай жұмыс форматы алғаш рет республикалық референдум кезінде сынақтан өткізіліп, байқаушыларды, азаматтық қоғам мен БАҚ-ты біріктіретін ашық ақпараттық алаң ретінде өзінің қажеттілігін көрсетті. Сол кезде тікелей қосылымдарға еліміздің 15-тен астам өңірінің өкілдері қатысып, ақпараттық хабар таратудың жиынтық аудиториясы 1 миллионнан астам пайдаланушыны қамтыды.