Жоспар жүзеге асса, денсаулыққа кері әсер етуі ықтимал өнімдерді жарнамалауға бірнеше ақпараттық алаңда шектеу қойылмақ. Олардың қатарында теледидар мен радио ғана емес, әлеуметтік желілер және көшелердегі сыртқы жарнама да бар.

Министрлік әсіресе құрамындағы қант, тұз, қаныққан және трансмайлардың мөлшері жоғары өнімдерге назар аударып отыр.

Ведомствоның түсіндіруінше, мұндай қадам балалардың қандай тағамды таңдайтынына жарнама арқылы ықпал етуді азайтуға бағытталған. Сонымен бірге баланың дұрыс тамақтану дағдысын ерте жастан қалыптастыру көзделеді.

Қазіргі уақытта ұсынылған талаптарды бірден енгізу мәселесі шешілген жоқ. Алдымен олардың бизнеске, тұтынушыларға және басқа тараптарға ықпалы бағаланбақ.

«Аталған ұсыныстарды іске асыру мақсатында осы шектеулердің реттеушілік әсерін талдауды әзірлеу жұмыстары басталды», – деп хабарлады министрлік.

Ведомствоның алаңдауына балалар арасындағы артық салмақ көрсеткіштері де себеп болып отыр.

Денсаулық сақтау министрлігінің зерттеу нәтижесіне сәйкес, еліміздегі 6-9 жастағы балалардың 23 пайызында артық дене салмағы анықталған. Ал осы жастағы балалардың 6 пайызы семіздікке шалдыққан.

Жасөспірімдердің энергетикалық сусындарды тұтынуы да назарға алынған. Зерттеу бойынша олардың 17,5 пайызы мұндай сусындарды апта сайын ішеді.

Фастфуд жарнамасына қатысты мәселе бұған дейін мемлекет деңгейінде де көтерілген. Президент Қасым-Жомарт Тоқаев Үкіметке мұндай өнімдердің агрессивті жарнамасына назар аударып, мәселені қарастыруды тапсырған болатын.

Мемлекет басшысы дұрыс тамақтанбауды насихаттайтын жарнама адамның зиянды әдеттерін қалыптастыруы мүмкін екенін айтқан. Оның салдары халық денсаулығына ғана емес, денсаулық сақтау жүйесіне түсетін жүктеме мен елдің еңбек әлеуетіне де әсер ететінін атап өткен.

Осыған байланысты Денсаулық сақтау министрлігі әзірлеген ұсыныстар қабылданса, балалар аудиториясына бағытталған кейбір тағамдар мен сусындарды жарнамалау тәртібі қайта қаралуы мүмкін.