AI & Digital Bridge 2026 форумы 1–3 қазан аралығында Астанада өтіп, халықаралық технологиялық компаниялардың өкілдерін, инвесторларды, кәсіпкерлерді, әзірлеушілер мен креативті индустрия мамандарын бір алаңға жинайды. Форум Қазақстандағы жасанды интеллектіні дамытуға арналған іс-шаралар айы – AI MONTH аясындағы басты оқиға болмақ.

Биылғы форумның тақырыбы – Kazakhstan is the Eurasian AI Hub. Бағдарламада AI индустриясын, цифрлық экономиканы және технологиялық кәсіпкерлікті дамыту, сондай-ақ жасанды интеллектіні бизнесте, мемлекеттік басқаруда және креативті индустрияларда қолдану мәселелеріне басымдық беріледі.

Форумға 20 мыңнан астам адам қатысады деп күтілуде. Көрме алаңында 100-ден астам технологиялық компания өз жобаларын таныстырады. Бағдарламаға қатысатын халықаралық қонақтардың қатарында Network School негізін қалаушы Баладжи Шринивасан, NVIDIA вице-президенті Рев Лебаредян, E-Space негізін қалаушы Грег Уайлер, General Atlantic төрағасы әрі бас директоры Уильям Форд, Solana Foundation президенті Лили Лю, сондай-ақ әлемдік технологиялық және инвестициялық компаниялардың өкілдері бар.

Іскерлік бағдарлама AI инфрақұрылымы, венчурлік инвестициялар мен цифрлық қаржыдан бастап, киберқауіпсіздік, таланттарды дамыту, GameDev және контент жасаудың жаңа тәсілдеріне дейінгі ауқымды тақырыптарды қамтиды. Қатысушыларды панельдік пікірталастар, негізгі баяндамалар, еркін форматтағы сұхбаттар, сұрақ-жауап сессиялары және практикалық воркшоптар күтеді.

Іскерлік бағдарламадан бөлек, қонақтар технологиялық көрме мен Startup Alley алаңын аралап, IT-компаниялардың жаңа әзірлемелерімен таныса алады. Сондай-ақ робототехника саласындағы жобалардың көрсетілімдерін тамашалап, Astana Hub Battle финалының қатысушыларына қолдау көрсетуге мүмкіндік бар.

Форум бағдарламасында креативті индустрияларға да ерекше орын берілген. Жасанды интеллект музыка, кино, визуалды контент пен цифрлық өнімдерді жасау үдерісін қазірдің өзінде өзгертіп жатыр. AI & Digital Bridge технология мен шығармашылықты бір алаңда тоғыстырып, жаңа құралдардың авторларға беретін мүмкіндіктерін және аудиториямен өзара байланыстың жаңа форматтарын көрсетеді.

Форумның қорытынды күніндегі басты музыкалық оқиға – Sadraddin-нің өнер көрсетуі. Қазақстандық әнші әрі ән авторы заманауи әуенді қазақ музыкалық мәдениетінің элементтерімен үйлестіретін өзіндік стилімен танымал. Оның шығармашылығы цифрлық платформалардағы миллиондаған тыңдарманның ықыласына ие. Өнерпаз Қазақстанның заманауи музыка сахнасын қалыптастырып келе жатқан жаңа буын орындаушыларының бірі саналады.

3 қазанда Sadraddin EXPO халықаралық көрме орталығының сахнасында өнер көрсетеді. Оның концерті тек технологиялық жетістіктерге ғана емес, жаңа цифрлық мәдениетті қалыптастырып жүрген адамдарға да арналған форум бағдарламасын толықтыра түспек.

2–3 қазанға арналған өзекті бағдарлама мен билеттер форумның ресми сайтында қолжетімді.

Форум туралы

AI & Digital Bridge 2026 форумы 1–3 қазан аралығында Астанадағы EXPO халықаралық көрме орталығында өтеді.

1 қазанда мемлекеттік органдар басшыларына, халықаралық делегациялар мен технологиялық индустрия өкілдеріне арналған арнайы жоғары деңгейдегі бағдарлама ұйымдастырылады. Бұл күнгі іс-шараларға қатысу шақыру арқылы жүзеге асырылады. Ал 2–3 қазанда форум билет иелері үшін ашық болады.

Ұйымдастырушылар – Қазақстан Республикасының Жасанды интеллект және цифрлық даму министрлігі, Astana Hub және Астана қаласының әкімдігі.

Форумның хедлайнерлері – Network School негізін қалаушы Баладжи Шринивасан, Higgsfield AI компаниясының тең құрылтайшысы әрі техникалық директоры Ерзат Дулат және Crimson Education компаниясының тең құрылтайшысы әрі бас директоры Джейми Битон.

Форум Қазақстандағы Цифрландыру және жасанды интеллект жылы аясында өтеді.

AI & Digital Bridge 2026 форумын өткізу серіктестердің қолдауымен демеушілік қаражат есебінен жүзеге асырылады.

Алтын серіктестер – Freedom Bank, Kaspi Bank, «Самұрық-Қазына» АҚ және «Қазақтелеком» АҚ. Күміс серіктес – Halyk Bank. Бизнес-серіктес – Beeline Қазақстан. Қола серіктес – Yandex Qazaqstan. Телеком-серіктес – «Freedom Telecom Operations» ЖШС. Технологиялық серіктес – «Транстелеком» АҚ. Ресми әуе серіктесі – Air Astana.