“Фердауси” атындағы мектепте әлі күнге хиджап дауы басылар емес. Аймақтағы барлық білім ошағында алғашқы қоңырау соғылып, сабақ басталып кетсе, бұл мектепте әлі күнге орамал мәселесі жыр болып жатыр, деп хабарлайды Евразия бірінші арнасы. Мәселен, күні кеше мектепке орамалмен келген жоғары сыныптың бірнеше оқушы қызы сабаққа кіре алмай қалған. Олармен бірге 20 шақты ата-анасы да қыздарын мектепке кіргізуді талап еткен. Екі жақты айқай шудан кейін бұл іске полиция араласқан. Сөйтіп, ата- аналар бірер сағаттан соң ғана тарқады. "Ол жерде біз баланың құқығын таптағанымыз жоқ. Ата аналарға 17 рет түсіндірілді. 2 рет ескертпе хат қолдарына берілді. 1 рет поштамен берілді. Тамыз айынан бері 12 рет жинадық. Ата аналарын түсіндіріп жатырмыз, жоқ!"- деді А.Фердоуси атындағы мектептің директоры Жанар Мамырова. Осылайша, мектеп директоры оқушы қыздардың орамалын шештіре алмай жүр. Былтыр осы мәселе бойынша ата-аналармен талай мәрте жиналыс өткізіліпті. Білім министрінің мектепте қандай да бір дінді насихаттайтын киім киюге тыйым салынғаны жайлы ережесі дүркін-дүркін түсіндірілген. Бірақ, баяғы жартас сол жартас. Биыл 372 оқушының тек, 80-ні ғана шешіпті орамалдарын. Қалғаны қасарысып, үйлерінде отыр екен. Сабаққа да келмепті. Бұл жағдайды мектеп әкімшілігі хаттама түзіп, облыстық білім саласын бақылау департаментіне тапсырдық дейді. Дегенмен, кейбір ата-ана мұғалімнің талабын дұрыс түсініп, қызының орамалын шештіріпті. Сөйтіп, мектепке кіруге рұқсат алған. Ал, заңға бағынбағандарға білім ұясының есігі тарс жабық. Мұны ауыл тұрғыны Тіллә ақсақал да дұрыс түсініп отыр. Жалпы, Фердауси мектебінде 372 оқушы қыз бар. Олардың 203-і жоғары, қалғаны бастауыш сыныптарында білім алады екен. Мектеп басшысының сөзінше, бастауыш сыныбындағы қыздардың барлығы орамалдарын шешкен. Енді жоғары сыныптың оқушы қыздарымен жұмыс істеп жатыр. Ал осы мәселеге қатысты пікір білдірген Білім және ғылым министрі жақын күндері ол ауылға арнайы жұмыс тобы барып, ата-аналармен жүздеседі. "Әкімшілікпен бірлесіп, оның ішінде жергілікті атқару органы бар, арнайы органдар бар сол бәріміз бір комиссия құрып, сол мәселемен айналысатын боламыз"- деді ҚР Білім және Ғылым министрі Ерлан Сағадиев.