Отырыста Астана әкімінің орынбасары Ермек Аманшаевтан басқасының бәрі орыс тілінде сөйлеген. Облыс әкімдері орынбасарларының қазақша сөйлемегені намысына тиген болар, депутат Бақытбек Смағұл екінші рет сөз алып, әріптестерін әбден ұялтты. "Біріншіден, екі облыс әкімі орынбасарының (Алматы облысы әкімінің орынбасары Айдарбек Байжанов, СҚО әкімінің орынбасары Дәурен Жандарбек) мемлекеттік тілде сөйлемегені — ұят дүние. Олар әлде мемлекеттік тілді білмей, менсінбегені ме, әлде Елбасының мақсат-мұратын құлағына ілмегені ме, түсінбей отырмын. Ұят нәрсе! Басшыларыңыз қандай аптал азаматтар! Ал сіздер парламентке келіп отырсыздар, бір ауыз амандасу да жоқ. Ұят емес пе, адамның намысы қайда?!", — деп ашуланды депутат. Осы кезде мәжіліс спикері Гүлмира Исимбаева үштілділік саясатын алға тартып, қонақтардың әрекетін ақтауға тырысты. "Қазір әрқайсымыздың екі тілде, тіпті үш тілде сөйлеуге құқығымыз бар. Қанша тіл білеміз, сонша тілде. Енді келген азаматтардың барлығы қазақ тілін білмейді деп айта алмаймыз, бәрі біледі. Тек өз ойларын жеткізу үшін біздің аудармаға кішкене сеніңкіремей, орыс тілінде сөйлегені ғой", — деп депутаттың ашуын басуға тырысты.