Денсаулық сақтау министрі пневмонияны цифрлық рентген-аппарат арқылы да анықтауға болатынын айтты. Елімізде өкпеге компьютерлік томография жасату үшін ұзын-сонар кезек байқалады. Бүгінде республикада 135 томограф жұмыс істейді. "Пневмонияны цифрлық ренгтен-аппараттың көмегімен де анықтауға болады. Ол қолжетімді әрі бағасы да арзан. Диагностиканың бұл әдісі коронавирусты анықтау мен емдеудің клиникалық хаттамасына енгізіледі", - деді Цой онлайн брифингте. Сонымен қатар, ол ауруханалардағы төсек-орын қорына да тоқталды. Айтуынша, бүгінде еліміздегі стационарларда төсек-орынның 60%-ке жуығы бос емес, ал Нұр-Сұлтан мен Алматы қалаларында бұл көрсеткіш 90%-ке дейін жетеді. Коронавирус жұқтырғандарды емдеу үшін 348 медициналық ұйымда 26 мың төсек-орын дайындалды. "Тамыз айының соңына дейін стационарларда қосымша он мың төсек-орын ашу жоспарланып отыр. Олардың құрылымында жансақтау бөлімдері және жасанды тыныс алдырту аппараттары бар интенсивті терапия палаталары болады", - деді министр. Цойдың ақпаратынша, қазір республикадағы ауруханаларда 3 294 дана жасанды тыныс алдырту аппараты істеп тұр. Қосымша тағы бір мыңға жуық аппарат сатып алу жоспарланған. Бүгінде елімізде індет жұқтырғандарды емдеу үшін 348 медициналық ұйымда 26 мың төсек-орын дайындалды.