Арыстанбек Мұхамедиұлының адвокаты  Төлеев  өз қорғауындағы экс-министрдің үстінен Тұңғышбай Жаманқұлов арыз жазғанын айтты, деп жазды "КҮН.КЗ" тілшісі. "Пандемия ковидқа байланысты кейінге шегерілген еді. Өздеріңіз білесіздер Тұңғышбай Жаманқұлов деген азамат бар. Сол кісі менің қорғауымдағы азаматқа жалған жала жауып, прокуратураға арыз түсірген. Сол арыз негізінде  заңсыз қылмыстық іс қозғалды",-дейді адвокат  Төлеев. Төлеевтің сөзінше, Мұхамедиұлының кінәсін дәлелдейтін бірде-бір дәлел, дәйек жоқ. Сондықтан ол мұны нақақтан тағылған айып деп есептейтінін жеткізді. “Кезінде Тұңғышбай Жаманқұловтың үстінен іс қозғалып, сотталды. Ол сол уақытта жауапқа тартылуына Арыстанбек Мұхамедиұлы себеп болды деп ойлаған. Сондықтан кек алу мақсатында оның үстінен арызданды”, – дейді адвокат. Астанадағы ауа райының қолайсыздығына байланысты Мұхамедиұлын сот залына жеткізу мүмкін болмаған. Ол сотқа онлайн түрде қатысып жатыр. Есте болса, актер Тұңғышбай Жаманқұлов бірнеше рет көлемді сұхбаттарында Арыстанбек Мұхамедиұлы Өнер  академиясының ректоры болған тұста келіспей қалып, кейіннен соның зардабын тартқанын айтқан.