Сенат төрағасы Мәулен Әшімбаев жалақысы қанша екенін және елімізге екі палаталы парламент не үшін қажет екенін айтты, деп хабарлайды KYN.KZ.

"Менің жалақым депутаттардың айлығымен деңгейлес. Сәл көбірек (1 млн теңгеден – автор)", - деді Әшімбаев сенат кулуарында.
Спикер Қазақстанға сенат не үшін қажет екенін түсіндірді. Әшімбаев үш себебін атады.
"Біріншіден, сенат – өңірлердің мүддесін қорғайтын палата. Біздің еліміз бұл Астана мен Алматы ғана емес, бізде проблемасы өте көп өңірлер бар.

Міне, сенат осымен айналысады. Екінші себебі – көптеген заң миллиондаған адамның тағдырын айқындайды, сондықтан оларды мұқият талдап барып әзірлеу қажет. Бұл жағдайда екі палаталы парламент тиімдірек жұмыс істейді: мәжілістің байқамай қалған не өткізіп алған дүниелерін біз мында көріп, жетілдіреміз, сөйтіп толығымен келісілген құжат қабылдаймыз", - деп атап өтті ол.

Ал үшінші себебі, Әшімбаевтың айтуынша, елдегі бүкіл саяси құрылымның теңгерімі тұрғысынан сенат өте маңызды рөл атқарады.