Мемлекеттік кірістер комитетінің мамандары мобильді аударымдар мен мораторийдің аяқалуына байланысты кәсіпкерлерді үрейлендірген ең маңызды сұрақтарға жауап берді, деп жазды KYN.KZ  тілшісі.

Кәсіпкерлерді тексеруге мораторийдің аяқталуы: жалпы тексерулер болмайды

Мемлекеттік кірістер органдары барлық мобильді аударымын тексермейді. "Жеке шоттарына 100 және одан да көп түрлі тұлғалардан мобильді аударымдарды ай сайын, қатарынан үш ай ішінде алған тұлғалар (маңызды: 100-ден көп аударымдар емес, 100 және одан да көп түрлі тұлғалардан түскен аударымдар) бақылауға жатады", - дейді МКК өкілдері. Қолданыстағы заңнамаға сәйкес, бұл кәсіпкерлік қызметтің белгісі. Сондай-ақ әр түрлі өмірлік жағдайда туыстарына, достарына және әріптестеріне мобильді аударымдар жасауға шектеулер жоқ.

Сатушы қолма-қол ақша талап етсе не істеу керек?

"Төлемдер және төлем жүйелері туралы" ҚР заңының нормаларына сәйкес, төлемнің түрлі тәсілі көзделген – банк картасымен, QR-төлеммен немесе қолма-қол ақшамен (25-бап). "Қолма-қол ақшасыз төлемдерді қабылдаудан бас тарту заңсыз болып саналады және тұтынушылардың құқықтарын бұзады. Кәсіпкерлердің төлем карталарын пайдалана отырып, төлемдерді қабылдаудан бас тартқаны үшін әкімшілік жауапкершілік бар: алғашында - ескерту, қайталап заң бұзғаны үшін – 147 680 теңге (40 АЕК) мөлшерінде айыппұл (ӘҚБтК-нің 194-бабы)", - деп ескертті комитеттегілер.