Президент Қасым-Жомарт Тоқаевқа парламент мәжілісі және Amanat партиясының төрағасы Ерлан Қошанов премьер-министр қызметіне Олжас Бектеновтің кандидатурасын ұсынды. Бұл туралы Ақордаға сілтеме жасаған KYN.KZ  тілшісі хабарлайды.

Бұл туралы ақпарат Ақорданың Telegram-дағы арнасында жарияланды.

"Президент Қасым-Жомарт Тоқаевқа парламент мәжілісі және Amanat партиясының төрағасы Ерлан Қошанов Премьер-Министр қызметіне Олжас Бектеновтің кандидатурасын ұсынды. Қолданыстағы заңнамаға сәйкес, мемлекет басшысы ұсынылған кандидатураны мәжілістегі партиялардың фракцияларымен жуық арада талқылайды"- делінген хабарламада.

Олжас Бектенов 1980 жылы Алматы қаласында дүниеге келген. Қазақ мемлекеттік заң академиясын заңгер мамандығы бойынша бітірген (2001). Еңбек жолын 2002 жылы Алматы қаласы әділет басқармасы бөлімінің бас маманы ретінде бастаған.

2005-2006 жылдары – ҚР Премьер-министрі кеңсесінде заң бөлімінің сарапшысы, бас сарапшысы.  

2006-2009 жылдары – ҚР Президентінің әкімшілігінде қызмет істеді.

2009-2012 жылдары – ҚР Әділет министрлігінің тіркеу қызметі және құқықтық көмек көрсету комитеті төрағасының орынбасары.

2012-2014 жылдары – ҚР Экономикалық қылмысқа жəне сыбайлас жемқорлыққа қарсы агенттігінің (қаржы полициясы) орталық аппаратында департамент бастығы.

2015-2016 жылдары – Астана қаласы әкімінің аппарат басшысы, ҚР Президенті әкімшілігінің басшысы хатшылығының меңгерушісі.

2016-2017 жылдары – Сыбайлас жемқорлыққа қарсы іс-қимыл ұлттық бюросының (Сыбайлас жемқорлыққа қарсы қызмет) Астана қаласы бойынша департаментінің басшысы.

2017-2018 жылдары – Ақмола облысы әкімінің орынбасары.

2018-2019 жылдары – ҚР Мемлекеттік қызмет істері және сыбайлас жемқорлыққа қарсы іс-қимыл агенттігі төрағасының орынбасары.

2019-2022 жылдары – ҚР Сыбайлас жемқорлыққа қарсы іс-қимыл агенттігі төрағасының бірінші орынбасары.

2022 жылдың ақпанынан 2023 жылдың сәуіріне дейін – Қазақстан Республикасының Сыбайлас жемқорлыққа қарсы іс-қимыл агенттігінің төрағасы.

2023 жылдың 3 сәуірінде мемлекет басшысының жарлығымен Қазақстан Республикасы Президенті әкімшілігінің басшысы болып тағайындалды.

Айта кетейік, кеше Қазақстан үкіметі отставкаға кетті. Қазақстан Республикасының премьер-министрінің міндеті Роман Склярға жүктелді.

Президенттің баспасөз хатшысы Берік Уәли Қазақстанда жаңа министрлер кабинеті қашан құрылатынын айтты.

Сондай-ақ, Ақорда Тоқаевтың қатысуымен үкіметтің кеңейтілген отырысы өтетінін еске салды – ол сәрсенбіде, 7 ақпанда өтеді. Өткен аптада Сенат спикері Мәулен Әшімбаев жоспарланған отырыстың күнін жариялады.

Сол кезде журналистер оған "Үкімет отставкаға кетуі мүмкін бе?" деген сұрақ қойды, бірақ Сенат төрағасы мұндай сұрақтарға жауап беруге өкілеттігі жоқ екенін айтты.

Айта кетейік, Қазақстан Республикасы үкіметінің құрамы 2023 жылдың күзінде жаңартылды, өйткені президенттің ел халқына жыл сайынғы жолдауынан кейін Қазақстанда жаңа министрліктер пайда болып, министрлер де ауысты. Сол жолы Смайылов орнында қалған.