Алматы әкімі Ерболат Досаев топырақтың лайлануы сапдарынан болған техногендік сипаттағы лай көшкіні болған жерге барды, деп хабарлайды қалалық әкімдік.

Қала басшысы бүлінген үйлерді аралап, шұғыл кеңес өткізді.

"Басты басымдық - іздеу-құтқару жұмыстары. Алдын ала ақпарат бойынша үйде тұратын адамдарды іздеу бойынша барлық жұмылдыру топтарының жұмысын үздіксіз қамтамасыз ету қажет", - деді Ерболат Досаев.

Көршілердің айтуынша, бұл үйде 4 адамнан тұратын отбасы болған.

Әкімнің тапсырмасы бойынша болған оқиғаның себептерін тексеру және лай көшкіні салдарын жою бойынша арнайы топ құрылды.

Еске сала кетейік, 8 ақпанда Медеу ауданының "Тау-Самалы" шағынауданындағы Олимпийская көшесі бойында техногендік сипаттағы топырақтың батпақтануы салдарынан лай көшкіні болған.

Сағат 08:00-дегі жағдай бойынша іздеу-құтқару жұмыстары жалғасуда. Бұл жерде жедел медициналық көмек бригадалары бар.

Алматы әкімдігі тек ресми деректерге сенуді сұрайды.