Атом электр станциясын салу-салмау мәселесі шешілетін референдумның датасын президент қана бекітеді. Бұл туралы Орталық сайлау комиссиясының мүшесі Шавкат Өтемісов мәлімдеді, деп хабарлайды KYN.KZ  тілшісі  Sputnik Қазақстан  сайтына сілтеме жасап.

"Қолданыстағы заңнама бойынша референдум күнін президент бекітеді. Сондықтан ол қазір бекітілмегендіктен, біз қашан болатынын айта алмаймыз", - деді Өтемісов сенат кулуарында.

Десе де Орталық сайлау комиссиясы күнделікті жұмысты жүргізіп жатыр.

"Сайлаушыларың тізімін анықтау, сайлау учаскелерінің шекарасын бекіту, жаңадан сайланған учаскелік комиссиялардың мүшелерін оқыту деген сияқты жұмыстар жүргізіліп жатыр. Яғни қазір біз өз жұмысымызды кәсіби негізде атқарамыз. Сондықтан қай уақытта болмасын, егер шешім қабылданса, референдум не басқа да сайлау науқаны болсын, жақсы деңгейде өткізуге дайынбыз", - деді ОСК мүшесі.

Бұған дейін президент Қасым-Жомарт Тоқаев ел аумағында атом электр станциясы салынып-салынбайтынын халық референдум арқылы шешетінін мәлімдеген еді.