Business.enbek.kz порталында (бұдан әрі - Портал) 2024 жылғы 20 мамырдан бастап 1-лек бойынша жаңа бизнес-идеяларды іске асыру үшін гранттар алуға өтінімдер қабылдау басталды,  деп жазады KYN.KZ тілшісі. 

Гранттар қайтарымсыз негізде беріледі, нысаналы мақсаты жаңа бизнесті бастау және дамыту болып табылады.

Грант көлемі 400 АЕК-ті (1 476 800 теңге) құрайды. Әр қатысушы оны тек бір рет ала алады.

Грант қаражаты ісін жаңа бастаған кәсіпкерлерге өздерінің бизнес-әлеуетін ашуға, өндірісті жолға қоюға және дамытуға, сол арқылы өзін тұрақты табыспен қамтамасыз етуге мүмкіндік береді.

Өтінім беру үшін қажет:

- Порталда тіркелу;

- грант алу шарттарына сәйкестігіне тексеруден өту;

- бизнес-жоспар үлгісін жүктеп алып, оны толтыру және порталға енгізу;

- өтініш нысанын толтыру және ЭЦҚ кілтімен қол қою.

Жаңа бизнес-идеяны іске асыруға грант алуға үміткер бола алады:

- тіркелген жұмыссыздар;

- жеке кәсіпкерлер (тіркеу мерзімі 3 жылға дейін).

Бұл ретте үміткер төмендегі әлеуметтік санаттардың бірінен болу керек:

- мүгедектігі бар адамдар;

- қолданыстағы «кандас» мәртебесі бар адамдар;

- өңіраралық қоныс аударушылар

- аз қамтылған отбасы мүшелері;

- көпбалалы отбасы мүшесі (жұбайы / зайыбы);

- мүгедектігі бар баланы тәрбиелеп отырған адам (жұбайы / зайыбы);

- асыраушысынан айырылу бойынша жәрдемақы алушылар.

Үміткердің «Бастау Бизнес» жобасы бойынша кәсіпкерлік негіздеріне оқыту туралы 3 жылдан аспайтын мерзімге сертификаты болуы тиіс.

Грантты: қажетті құрал-саймандарды, еңбек құралдарын, технологиялық жабдықтарды, малдарды, жануарларды, құстарды, көшеттерді, бұталарды, тұқымдарды сатып алуға, орын-жайларды жалға алу ақысын төлеуге алуға болады.

Гранттарды Еңбек мобильділігі орталығы грант алуға үміткерлердің өтініштерін қарау жөніндегі аудандық/қалалық комиссияның шешімі негізінде береді.