Белгілі продюсер Нұрлан Қоянбаев өзін сынап жатқан жұртқа жауап берді. Оның жаңа қызметке тағайындалуына байланысты теріс пікірлер жазғандар бар, деп хабарлайды KYN.KZ ақпарат агенттігі.

Айтуынша, комедиялық фильм түсіріп жүрген ол ендігіде креативті ойлары арқылы еліне қызмет көрсеткісі келеді. Бұл туралы пікірін Қоянбаев Instagram парақшасында бөлісті.

«Мен Қазақстан Республикасының азаматымын. Қызылорда облысы Шиелі ауданының тумасымын. №45 гимназия мектебін алтынға бітірдім. Қазақ Ұлттық Әл-Фараби университетінің тарих факультетінде білім алдым. Экономика және құқық академиясында финанс және кредит мамандығын бітірдім.

300 милиондық аудиториясы бар, ең ірі жастардың ойынында, Мәскеу қаласында қазақтың әзілін төрге шығарған команданың капитаны болдым. (тек мықты мемлекеттердің ғана әзілі дамыған: АҚШ, Англия, Франция т.б) Телеарна саласында бағдарламамыз 9,3 рейтингімен рекордтық нәтиже көрсетті. Оны телеарна саласында қызмет атқаратындар, телевизия тарихындағы ең жоғарғы рейтингтерінің бірі екенін айтып бере алады.

Кино саласына келіп, ол саланың маманы болмасам да, Голливудтың дәуірін тоқтаттым. Мемлекеттік бюджеттен бір тиын алмай, жұмыс істеуге болатынын көрсеттік. Бұл үрдіс жас режиссерлерге серпін беріп, жол ашып, кейінгі уақытта жылына 120 ға жуық отандық фильмдер түсіріліп жатыр. Яғни, жыл сайын Голливудқа кететін 100 млн долларға жуық ақша, енді елімізде қалуда. Ол дегеніміз 4-5 жылда 500 млн доллар!

Мұның барлығы креативтің арқасында. Осы креативті ойларымды пайдаланып еліме қызмет еткім келеді.

Облыс әкімдерімен кездесіп, көп ойларыммен бөлісіп жүрмін. Әзірге тек Түркістан облысы ғана креативті идеяларымды қолдады. Ешқандай айлықсыз және бюджеттен тыс», - дейді Қоянбаев.

Сондай-ақ, ол өзін «сайқымазақ» дегендерге ашуланып, ренішін айтты.

«Байқағаным, кейбір журналистердің мақалаларында “Сайқымазақ”, “Клоун” деген сияқты сөздер шығуда. Мен сайқымазақ емеспін, мен қазақпын! Ешкімге керек емес, ешкім мән бермитін әзіл саласында 25 жыл еңбек етіп, 5 мың теңгелік айлықтан, 100 миллион долларлық индустрияны қалыптастырған креативті продюсерлердің бірімін!

Мысалы, Қазақстан Республикасының Ақпарат министрлігінің вице-министрі - Кочетов Евгений деген азамат тағайындалғанда ешкім шулап, резонанс тудырмады. Мен де Кочетов Евгений сияқты еліме қызмет жасағым келеді. Неге мен өз елімде тіпті, айлығы жоқ қызметке тұрғанда, ақталып, пост жазуым керек?!

Негізі, негатив жазатындар көп емес. Айтқым келгені, елімізді дамытамыз десек, позитивті, текті қазақтардың белсенділігі қажет», - деп жазды Нұрлан Қоянбаев.

Продюсерді оқырмандары қолдап, ісіне сәттілік тіледі.

 

 

 

 

Посмотреть эту публикацию в Instagram

 

 

 

 

 

 

 

 

 

 

 

Публикация от Nurlan Koyanbayev 🇰🇿 (@koyanbayevnurlan)