Жамбыл облысында емшіні шақырып, құрметпен қарсы алған Тұрар Рысқұлов ауданы Тереңөзек ауылындағы мектепте арнайы тексеріс жүргізілді. Емшінің мектепке салтанатты киіммен келгені видеоға түсірілген. Оның артынша  ол кездесуге мұғалімдерден 4 мың теңгеден жиналды деген мәлімет шықты. Ақыр соңы желіні шулатқан жиынға арнайы тексеру ұйымдастырылды, деп жазды Kyn.kz  тілшісі.

Тексеруді Жамбыл облысының Балалардың құқықтарын қорғау жөніндегі уәкілі мен Жамбыл облысы әкімдігінің білім сапасын қамтамасыз ету департаментінің қызметкерлері жүргізді. Білім, ақпарат және әлеуметтік даму басқармаларының қызметкерлерінен құралған жұмыс тобы да барған.

Тексеру қорытындысы бойынша Тұрар Рысқұлов ауданы әкімінің орынбасары А.Терлікбаев мен Жамбыл атындағы мектеп директоры Е.Зәкімбаев өз өтініштері бойынша қызметінен босатылған.

Тұрар Рысқұлов аудандық ішкі саясат бөлімінің басшысы мен Тереңөзек кентінің әкіміне қатаң сөгіс түріндегі тәртіптік жаза қолданылған.

Еске салайық, бұған дейін желіде Тереңөзек ауылындағы орта мектепте өткен шарадан сәнді көйлек киіп, тәжге ұқсас бас киім киген әйел бейнеленген видео пайда болды. Оны мектепте кино жұлдызындай қарсы алған: адамдар жолдың екі жағына тізіліп, ал мектеп оқушылары оның көйлегін көтеріп жүрген. Басқа кадрларда сол әйелдің сыныпқа қалай кіргені және оның аяғына раушан гүлдерін тастап жатқаны көрсетілген.

Видеода Томирис патшайымының бейнесін сомдаған Гүлсара Көпбаева көрсетілгені атап өтілді. Ол бір кездері өзі бітірген мектепке қайырымдылық көмек көрсету үшін келген.

Қонақты лайықты қарсы алу үшін ұстаздардан төрт мың теңге жиналып, тіпті емшінің құрметіне концерт те ұйымдастырылған екен.