Цифрлық даму, инновациялар және аэроғарыш өнеркәсібі министрі Талғардағы қайғылы жағдай кезінде TikTok әлеуметтік желісінде боттар белсенділігі артты деген мәліметке қатысты пікір білдірді. Бұл туралы Жасұлан Мәдиев үкіметтің сейсенбідегі брифингінде айтты, деп хабарлайды KYN.KZ ақпарат агенттігі.

Ол «Талғардағы қайғылы оқиға кезінде Қазақстанда боттардың ерекше белсенділігі артты» деген ақпаратты жоққа шығарды. 

Кибершабуылды зерттеу және сараптау орталығы TikTok пен Instagram әлеуметтік желілерінде Алматы мен басқа да қалаларда митинг болып жатқаны туралы фейктер пайда болғанын және ол жерде қаңтар оқиғасындағы видеолар қолданылған деп жариялаған болатын. 

 «Жақында кибершабуыл орталығы таратқан мәліметті алар болсақ, мен TikTok өкілдерімен - аймақтағы директорымен талқыладым. Олар боттар ұясы болып көрінген аккаунттар бір-бірімен байланысты емес екенін айтты. Олар боттар бірге әрекет етті деген мәліметті растамады. TikTok-тың нақты дәлелі менде бар», - деп мәлімдеді Жасұлан Мәдиев.