Алматыда бірнеше рейс ауа райының қолайсыздығына байланысты кешіктіріліп жатыр, деп хабарлайды KYN.KZ ақпарат агенттігі Tengrinews.kz сайтына сілтеме жасап.

Қалада қар жауып тұр. Алматы әуежайындағы рейстердің жағдайын онлайн-табло арқылы қарап көрдік. Нәтижесінде, бірнеше ұшақтың кешігетіні анықталды.

16:20-дағы жағдай бойынша 10 рейс кешігіп келеді.

Сондай-ақ, дәл осы уақытта 4 рейстің ұшуы кейінге шегерілген. Мысалы, FlyArystan-ның Астанаға және Air Astana-ның Душанбе қаласына ұшатын рейстері кешігеді.

Air Astana әуе компаниясының баспасөз қызметі Алматыдан ұшатын рейстердің ауа райының нашарлауына байланысты кешігіп жатқанын хабарлады.

"Әуежайға бармас бұрын рейсіңіздің мәртебесін әуе компаниясының сайтынан тексеруді сұраймыз", – делінген әуе тасымалдаушының хабарламасында.