Нұрлан Сегізбаев қазақ балаларының бәрі бірнеше қайтара тамашалаған "Менің атым Қожа" фильмінде басты рөлді сомдаған еді, деп жазды KYN.KZ  тілшісі.

Бұл туралы желідегі парақшасында  Жанар Қанафина жазды.

"Балалық шағымыздың символына айналған Қожаны сомдаған актер — Нұрлан Сегізбаев (Санжарұлы) бүгінде ауыр сырқатпен күресіп жатыр. Оның айтуынша, дәрігерлер оған ХОБЛ (өкпенің созылмалы обструктивті ауруы) ауруының 4-дәрежесі диагнозын қойған және жарты жыл ғана уақыт беріп отыр",- дейді журналист. 

Қазір 75 жастағы Нұрлан Санжарұлына қаржылай көмек ауадай қажет. Бұл қаражат ем-дом мен өмірінің соңғы істерін аяқтау үшін керек. Журналист әзірге ақшаны қайда аудару керегін білмейтінін жеткізді. 

Жанар Қанафинаның сөзінше, бұған дейін актер ұзақ жылдар бойы ұстаздық еткен, алайда қазіргі денсаулығына байланысты жұмыс істеуге қауқарсыз. Ол тәулігіне 14 сағат тыныс алу аппаратында отыруы керек.