23 мамыр күні мұғалімді балағаттағаны үшін НЗМ-нен шығарылған жасөспірім ауруханаға түсті. Бұл туралы «За нами уже выехали» жазды, деп хабарлайды KYN.KZ ақпарат агенттігі.

«11-сынып оқушысы бақылау жұмысы кезінде ұялы телефонмен ұсталды – осыдан кейін ол мұғалімді балағаттады. Сол себепті мектептің педагогикалық кеңесі оны НЗМ-нен шығару туралы шешім қабылдады», – делінген хабарламада.

Бұл жағдайға Мәжіліс депутаты Ирина Смирнова да пікір білдірді.

«23 мамырда баланы мектептен шығару мүмкін бе? Ол қайда барады? Қай мектеп қабылдайды? Алматыдағы Назарбаев мектебі, сіздер оқушының құқығын бұзып отырған жоқсыздар ма? Бұл шешімдеріңіз заңсыз емес пе? Сіздердің қоғам күткен кәсіби деңгейлеріңіз күмән туғызбай ма?» – деді Смирнова.

Оған жауап ретінде НЗМ басқарма төрағасы Әнуар Жанғозин оқушыны шығару шешімі қисынды және негізделген деп мәлімдеді.

«Мектеп мұғалімі ұялы телефонды тәртіпке сай тәркілеген. Алайда оқушы агрессия танытып, мұғалімді балағат сөзбен қорлады. Бұл жағдай куәгерлердің қатысуымен тіркелген және тиісті дәлелдер бар. Мұндай әрекет мектеп тәртібі мен мұғалімге құрмет көрсету қағидаларына ғана емес, жалпы адамгершілік құндылықтарға да қайшы. Оқушының бұрын да тәртіп бұзғаны болған. Мұғалімді құрметтеу – сапалы білім берудің негізі, сондықтан біз мұндай ауыр оқиғаға бей-жай қарауға құқығымыз жоқ. Осы себепті мектептің педагогикалық кеңесінің оқушыны шығару туралы шешімі – қисынды және әділетті. Бұл жағдайды терең зерттеп, қажетті қорытындылар жасаймыз. Сонымен қатар, бүкіл жауапкершілікті мектепке жүктеу дұрыс емес – мұнда отбасы мен қоғам да жауапты екенін ұмытпау керек. Қазіргі уақытта оқушыны басқа мектепке ауыстыру мәселесі келісілген», – деді Жанғозин.

Келесі күні жасөспірім видеоүндеу жасап, кешірім сұрап, оқуын аяқтауға мүмкіндік беруін өтінді. Оның айтуынша, ата-анасы орыс тілін білмегендіктен, шығару туралы құжатқа қол қойған.

Мәжіліс бұл оқушыны шығаруды заңсыз деп таныды.

«Әкесі мен шешесі қарапайым адамдар, ол орыс тілінде білім алуды таңдаған соң, ата-анасы оған көмектесе алмады, өйткені олар тек қазақша сөйлейді. Ол НЗМ-ге өз бетімен дайындалып, 2 мың баланың арасынан үздік 50-ге кірді. Сұнқардың үлгерімі жыл сайын үздік болған. Оның телефоны тәркіленсе де, математика емтиханында пайдаланғанын ешкім дәлелдей алмайды – ол бұл пәнді үздік біледі. Айтпақшы, сол күні тағы алты оқушының телефоны алынған. Мектеп те, министр де, тіпті сот та баланы орта білімнен айыруға құқылы емес. 18 жасқа толмаған кез келген бала орта білім алуы тиіс. Егер НЗМ мемлекет есебінен оқытуды мойнына алса, онда бұл міндеттемесін орындауы тиіс. Бұл енді жеке бизнес емес – бұл мемлекеттік тапсырыс, ал стандарттар мен ережелерді мемлекет бекітеді. Мектептің құрылтайшысы – үкімет», – деді депутат Мұрат Әбенов.

Сонымен қатар, Әбеновтың айтуынша, НЗМ бағдарламасы өзгеше болғандықтан, оқушыны қарапайым мектепке ауыстыру мүмкін емес.

Қоғам белсендісі Аида Букаеваның айтуынша, баланы ауруханаға жатқызған.

«Өзін көрсеткісі келген мұғалімге баланың құлдырауы керек пе? Ол тамақ ішпей, бес күн жылап, ақыры жүйкесі сыр беріп ауруханаға түсті» – деді Букаева.

Бұл мәселеге Оқу-ағарту министрі Ғани Бейсембаев араласты. Қазір мектепке бала құқықтарын қорғау комитеті мен аумақтық департамент өкілдері жіберілді.

«Оқу-ағарту министрлігі мұғалімнің мәртебесін түсіретін кез келген әрекетке қарсы. Сонымен бірге, біз оқушы өз қатесін түсінгенін көріп отырмыз. Бұл жағдайда НЗМ ішкі ережелермен қатар, гуманизм мен кәсіби педагогика қағидаттарын да басшылыққа алады деп сенеміз», – деді Бейсембаев.