ҚР Сыртқы істер министрлігінің ресми өкілі Айбек Смадияров Қытайда өмір бойына бас бостандығынан айырылған қазақстандық Ақжарқын Тұрлыбайға қатысты жағдайға пікір білдірді, деп хабарлайды KYN.KZ ақпарат агенттігі.

Смадияров бұл істі одан әрі қарау еліміздің Бас прокуратурасының құзыретінде екенін айтты.

«Қажетті барлық жұмыстарды біз атқардық. Бұдан әрі ақпарат алмасу – Бас прокуратура желісі бойынша жүзеге асады», – деді ол.

Журналистер Қазақстан елшілігінің өкілдері Тұрлыбаймен шынымен кездесті ме деген сауал қойды.

«Бұл – біздің консулдың жыл сайынғы жоспарлы түрдегі міндеті. Шетел түрмелерінде отырған азаматтарымызды барып көреді. Сондықтан бұл жұмыс жүргізіліп жатыр», – деп түсіндірді ол.