Жаңа оқу жылынан бастап шәкіртақы 84 мың теңге болады, деп хабарлайды KYN.KZ ақпарат агенттігі Ақордаға сілтеме жасап.

Бұл туралы президент Қасым-Жомарт Тоқаев мұғалімдердің республикалық Тамыз конференциясында айтты.

"Биыл білім беру саласына 13 мыңнан астам грант бөлінді. Педагог мамандығы бойынша оқып жатқан студенттердің шәкіртақысы бес жылда екі есе көбейді. Жаңа оқу жылынан бастап шәкіртақы 84 мың теңге болады.

Осындай нақты шаралардың нәтижесінде жастардың мұғалім болуға ынтасы артып келеді.

Былтыр 1800-ге жуық "Алтын белгі" иегері педагог мамандығына оқуға түскен. Ал биыл 2 мыңнан астам үздік түлек ұстаз мамандығын таңдап отыр. Бұл – барлық "Алтын белгі" иегерлерінің 23 пайызға жуығы деген сөз. Мұның бәрі қоғамда ұстаздардың абырой-беделінің арта түскенін аңғартады. Мұғалімнің білігін, мәртебесін көтеру және білім сапасын арттыру үшін басқа да көптеген шаралар атқарылды. Нәтижесі жаман емес.

Биыл оқушыларымыз әлемдегі ең беделді жеті олимпиададан 27 медаль алды. Бұдан бөлек халықаралық олимпиадалардан 1000-ға жуық медаль иеленді. Бұл, әрине, ұл-қыздарымыздың сапалы білімі мен терең ізденісі және ұстаздардың қажырлы еңбегінің жемісі", - деді президент.

Айта кетейік, жақында мемлекет басшысы осындай бір топ оқушыны Ақордаға арнайы шақырып, марапаттаған. Олар қазақтың зияткер ұлт екенін бүкіл әлемге танытып жүр дейді мемлекет басшысы.