Үкілі бала ретінде танылған Ерболсын Серікбаев ақша үшін ғана адам емдейтінін жеткізіп, бар шындығын жайып салды, деп хабарлайды KYN.KZ ақпарат агенттігі.

Бұл туралы журналист Аман Тасығанға берген сұхбатында әңгімеледі. Айтуынша, 11 жастағы оған психологтар мен молдалар басқа көзбен қарай бастаған. Сол себепті ол өз-өзіне жабылып, үнсіз қалыпты.

“Қазақ менталитетінде үлкен кісіге артық сөйлеуге болмайды, қарсы шығуға болмайды деген бар. Оны қазір түсінемін, бірақ ол кезде оны түсінбедім. Ол жерде 11 жастағы бала өз ойын айтты, өз-өзін қорғау керек еді. Өйткені, ол жерде оны қорғайтын бірде бір адам болған жоқ. Ол кезде болған оқиғаға мен қазір өкінбеймін. Қазіргі таңда оның қорытындылайтын нәтижесі бар", – дейді ол.

Қазір емші бала шетелге барып медициналық білімін жетілдіріп жүргенін айтады. Сондай-ақ, адамдарды ақша үшін емдейтінін де жеткізді.

“Әлі күнге дейін ақша үшін ғана адам емдеймін. Ақша керек болмаса, емдемеуші едім. Маған біреудің проблемасы, ауру баласымен арпалысқан керек емес. Ақша үшін жұмыс істемеймін деген адамдарға сенбеймін. Қазіргі атқаратын жұмысымды жақсы ақшаға бағалаймын. Өзінің ставкасынан бөлек, үстіне қосып беретін жұмысым бар. Өйткені нәтиже бар. Қарапайым адамға консультация беру де менің уақытым мен энергиямды алады. Топтық емдердің ақысы әртүрлі. Бір қабылдауым – 200 доллар. Қазақстанға келгенде 100 доллар болады. Өйткені еліміздегі халықтың әл-ауқатын түсінемін. Теңгемен шаққанда 50 мың теңге. Қатты қымбат емес деп ойлаймын”, – дейді емші бала.