Прокурор мас күйінде әйелі Айзат Жұманованы қасақана өлтіргені үшін Айбар Жанболатты 15 жыл бас бостандығынан айыру жазасын сұрады, деп хабарлайды KYN.KZ ақпарат агенттігі.

Айбар Жанболат қылмыстық кодексінің 99-бабының 1-бөлімі –  кісі өлтіру бойынша айыпталуда. Прокуратура оған 15 жылға бас бостандығынан айыру жазасын тағайындауды сұрап отыр.

Прокурор Нұржан Билибеков айыптау актісін оқып шықты.

"Қылмыстық кодекстің 99-бабының 1-бөлігіне сәйкес, айыпталушы А.Ж. орташа қауіпсіздіктегі түзеу колониясында 15 жылға бас бостандығынан айыруды сұраймын. Сондай-ақ, сотталушының сотқа дейінгі қамауда ұстау шарасын күшінде қалдыруды сұраймын", - деді прокурор.

Еске салсақ, қайғылы оқиға 2025 жылдың 22 маусымында Талдықорғанда болды. Ақсу ауданының Баласаз ауылында туған 33 жастағы ер адам мас күйде үйдің алдында Айзатқа күш қолдана бастаған. Ол әйелдің денесі мен басын қолымен ұрып, аяғымен тепкен. Тіпті әйел оны тоқтатуды сұрағанда да әрекетін жалғастырған. Ауыр ішкі жарақаттар салдарынан Айзат көз жұмды.