Ресейде COVID-19 инфекциясының XFG деп аталатын жаңа мутациясы тіркелді. Мәліметтерге сәйкес, штамм елдің 85 өңірінде анықталып, стационарға жатқызылған науқастардың бір бөлігінен табылған. Мамандар XFG нұсқасы алдыңғы варианттарға қарағанда тезірек жұғуы мүмкін екенін айтады.

Дәрігерлер жаңа штаммның негізгі белгілері ретінде жөтел, дене қызуының көтерілуі және әлсіздікті атайды. Кей жағдайларда тамақ қарлығуы мен дауыстың уақытша жоғалуы да байқалуы ықтимал.

Ал Қазақстанда XFG штаммы тіркелгені туралы ресми ақпарат жарияланған жоқ. Сарапшылар қазіргі уақытта ел үшін тікелей қауіп деңгейі жоғары емес екенін мәлімдейді.

Дегенмен мамандар сақтық шараларын ұстануды ұсынады:

▫️ адам көп жиналатын орындарда маска тағу;

▫️ қол гигиенасын сақтау, антисептик қолдану;

▫️ ауру белгілері байқалса, дәрігерге жүгіну.

Жағдай бақылауда. Алайда көрші елдегі эпидемиологиялық ахуалды ескере отырып, жеке қауіпсіздік шараларын сақтау маңызды.