АҚШ президенті Дональд Трамп Иран басшылығын толықтай ауыстыруды қолдайтынын жеткізді. Сонымен қатар Вашингтонда «жақсы көшбасшы» бола алатын бірнеше  кандидат бар екенін мәлімдеді, деп хабарлайды KYN.KZ ақпарат агенттігі.

Бұл туралы NBC News телеарнасына берген сұхбатында айтты.

«Біз барып, бәрін тазартқымыз келеді… Біз олардың жақсы басшысы болғанын қалаймыз. Менің ойымша, бұл жұмысты жақсы атқара алатын бірнеше адам бар», — деді Трамп.

Алайда Трамп нақты кімдерді кандидат ретінде қарастырып отырғанын ашып айтпады.

Айта кетейік, бұған дейін Трамп Иранның келесі көшбасшысын таңдауға өзі жеке қатысуы қажет екенін мәлімдеген болатын. Ол бұл тәсілін Венесуэлада қолданғанын атап өткен еді.

Бұған дейін қаза тапқан жоғарғы жетекшінің 56 жастағы ұлы Моджтаба Хаменеи әкесінің орнына негізгі мұрагер болуы мүмкін деген ақпарат тараған болатын. Дегенмен бұл туралы әзірге ресми мәлімдеме жоқ.