Мәжіліс депутаты Ирина Смирнова Қазақстанда 7–9-сынып оқушылары үшін жыныстық тәрбие мен салауатты өмір салты бойынша міндетті модульдерді енгізу туралы премьер-министрдің орынбасары Аида Балаеваға депутаттық сауал жолдады, деп хабарлайды KYN.KZ ақпарат агенттігі.

Смирнова соңғы жылдары биология орта білім беру жүйесінде "басым пән мәртебесінен айырылып қалғанын" мәлімдеді.

"Дәл осы биология сабақтарында жаратылыстану-ғылыми дүниетаным негіздері, өз денесі, физиология, анатомия, гигиена, аурулардың алдын алу, вакцинация қажеттілігі және салауатты өмір салты қағидаттары туралы білім қалыптасуы тиіс", - делінген сауалда.

Смирнованың пікірінше, мектептерде репродуктивті денсаулық, жыныстық жетілу тақырыптары дұрыс айтылмайды. Ол мұның бір себебі ретінде кейбір мұғалімдердің жыныстық тәрбие, психикалық денсаулық, АИТВ және ЖИТС сияқты нәзік тақырыптарды талқылауға әдістемелік дайындығының төмендігін атады.

Сондай-ақ депутат биология бойынша сағаттардың қысқаруын, зертханалық және практикалық жұмыстардың тапшылығын, сондай-ақ оқулықтардың тым теорияға негізделіп кеткенін айтты.

Осыған байланысты Смирнова оқу жоспарлары мен бағдарламаларын қайта қарауды, 6-сыныптан бастап биология сағаттарын көбейтуді, пәнді оқытуға жүйелі тәсілді қайтаруды және физиология, адам денсаулығы, репродуктивті денсаулық, гигиена, экология мен тұрақты даму блоктарын күшейтуді ұсынды.

Сондай-ақ,  биология мұғалімдерін қайта даярлау, кабинеттердің жабдықталуын бақылауды күшейту, денсаулық пен экологияға қатысты практикаға бағытталған тапсырмаларды қорытынды аттестаттауға енгізу, сондай-ақ 9 және 11-сыныптардағы емтихандардың тек тест түріндегі форматынан біртіндеп бас тарту бар.

Смирнованың пайымдауынша, бұл шаралар оқушылардың жаратылыстану-ғылыми сауаттылығын арттыруға және олардың өз денсаулығы мен қоршаған ортаға саналы көзқарасын қалыптастыруға көмектеседі.