Үндістанның Times of India басылымы Үндістанның велоспорт құрамасында жұмыс істеген Қазақстаннан шыққан 34 жастағы жаттықтырушыға Патиаладағы Ұлттық жоғары жетістіктер орталығында (NCOE) кәмелетке толмаған велошабандоз қызды зорлады деген күдік бойынша Балаларды жыныстық қылмыстардан қорғау туралы заң (POCSO) аясында іс қозғалғанын хабарлады.

«Патиала полициясы Қазақстанның бұрынғы кәсіби шосселік велошабандозы Мақсат Аязбаевты іздеуде.Патиала полициясының аға суперинтенденті Хармандип Сингх Хансаның айтуынша, өткен аптада арыз түскелі бері оның қайда екені белгісіз. Полиция оның төлқұжатын тәркіледі және оны іздеу үшін екі топ құрылды», – деп жазды басылым.

Қазақстанның Велоспорт федерациясы аталған жағдайға қатысты ресми Instagram парақшасында мәлімдеме жариялады. Федерацияның мәліметінше, Мақсат Аязбаев соңғы жылдары Қазақстаннан тыс жерде үнді тарапымен жасалған келісімшарт негізінде кәсіби қызмет атқарып, Үндістанның ұлттық велоспорт құрамасын дайындаумен айналысқан.

«Оның кәсіби қызметі қазіргі уақытта нақты Үндістан ұлттық құрамасымен байланысты болды. Қазіргі уақытта Мақсат Аязбаевтың Қазақстан ұлттық құрамасына ешқандай қатысы жоқ. Жарияланымдарда көрсетілген оқиғалар оның Үндістан тарапы үшін жұмыс істеген кезеңінде Үндістан аумағында болған және оларды Үндістанның құқық қорғау органдары қарастырып жатыр», – делінген ұйым мәлімдемесінде.

Федерация қазіргі уақытта Үндістанның құқық қорғау органдары ресми тергеу жүргізіп жатқанын атап өтті.

«Қолда бар ақпаратқа сәйкес, қылмыстық іс қозғалған, ал Үндістанның Велоспорт федерациясы маманның қызметін тергеу аяқталғанға дейін тоқтатқан.Біз ресми тергеу аяқталып, істің барлық мән-жайы Үндістанның құзыретті органдары тарапынан анықталғанға дейін мерзімінен бұрын қорытынды жасамауды және баға бермеуді дұрыс деп санаймыз.Қазақстанның Велоспорт федерациясында Үндістанның құқық қорғау органдары жүргізіп жатқан тергеудің мән-жайына түсініктеме беруге негіз жоқ және федерация тек құзыретті органдардың ресми ақпаратына сүйенетін болады», – делінген мәлімдемеде.

Федерация сондай-ақ нақты адамның әрекетін Қазақстанның ұлттық велоспорты мен ұлттық құрамасының қызметінен ажыратудың маңызды екенін атап өтті.

«Бұқаралық ақпарат құралдарының өкілдері мен әлеуметтік желі қолданушыларынан жарияланымдарды дайындау және тарату кезінде осы ақпаратты ескеріп, аталған жағдайды Қазақстанның ұлттық құрамасымен негізсіз байланыстыруға жол бермеуді сұраймыз.Адамның кінәсі заңда белгіленген тәртіппен, ресми тергеу мен сот талқылауының нәтижелері негізінде ғана анықталуы мүмкін», – деп мәлімдеді ұйым.