Қоғам белсендісі Санжар Бокаевқа қатысты қозғалған қылмыстық іс жөнінде пікір білдірді. Оның айтуынша, тергеу екі эпизод бойынша жүргізіліп жатыр. Біріншісі – ақшалай қаражатты иемденуге байланысты алаяқтық жасады деген күдік, екіншісі – орманды заңсыз кесу.

Полтаренко бұл жағдайда азаматтық белсенділігі үшін қудалау емес, қылмыстық айыптаулар туралы сөз болып отырғанын атап өтті.

Оның сөзінше, бұған дейін Бокаев қоғамдық қызметпен еш кедергісіз айналысып, экологиялық мәселелерді де көтеріп келген. Бұл бағыттағы жұмысына ешқандай шектеу қойылмаған.

Қоғам белсендісі Бокаевтың айтқан сөздері мен іс жүзіндегі әрекеттері бір-біріне қайшы келетінін алға тартты.

«Экология мәселесімен айналысатын адам орманды кесіп жатыр. Бұл мен үшін ақылға сыймайтын қайшылық», – деді Полтаренко.

Оның пікірінше, қоғамдық қызметпен айналысу ешкімді заң алдындағы жауапкершіліктен босатпайды. Заң алдында барлығы тең. Сондықтан құқық қорғаушылар тек қылмыстық сипаттағы істерді саяси мәселеге айналдырмауы керек.

Еске салайық, Санжар Бокаев ұлттық компанияда жұмыс істеген кезеңінде аса ірі мөлшерде алаяқтық жасады деген күдікке ілінген. Сондай-ақ оған ағаштарды заңсыз кесуді ұйымдастырды деген күдік тағылып отыр.

Ескерту: Мәтіндегі қылмыстық әрекеттер туралы мәліметтер күдік пен Дмитрий Полтаренконың пікірлері ретінде берілді. Адамның кінәсі соттың заңды күшіне енген үкімімен ғана анықталады.