Олжас Нұралдиновтың айтуынша, 1 желтоқсанда күшіне енетін жаңа талаптар қуаттау станцияларының операторлары үшін қосымша шығын әкеледі.

Енді мемлекет электромобиль алатын электр энергиясының көлемін ғана емес, сонымен қатар кернеуді, ток күшін және қуаттау уақытын да бақылайтын болады.

"Бизнестің қосымша шығындары сайып келгенде тарифке қосылуы мүмкін. (...) Кернеудің, ток күшінің және қуаттау уақытының дұрыстығы іс жүзінде қалай тексерілетіні әлі де түсініксіз. Соған қарамастан, талап қабылданып қойған және оның күшіне ену мерзімі белгіленген", – деді ол.

Депутаттың айтуынша, тексеру жүргізу тәртібі әлі толық айқындалмаса да, бизнес жаңа тексерістер үшін ақы төлеуге міндетті болып отыр.

Айтуынша, электр қуаттау бекеттерінде жағдай әлдеқайда күрделі. Әртүрлі электромобильдер әртүрлі қуатты қабылдауы мүмкін: бірі тезірек, екіншісі баяу қуатталады.

"Тіпті бір көліктің өзі аккумулятордың температурасына, оның қуат деңгейіне және батареяның күйіне байланысты әртүрлі уақытта әртүрлі қуат қабылдайды. Нәтижесінде операторға өзі толық бақылай алмайтын параметрлерді тексеру бойынша қосымша шығындар жүктеледі", – деді ол.