Ер адам ақшасы жоғалғанын елордаға келгеннен кейін байқаған. Бұл туралы көліктегі полиция департаменті бастығының бірінші орынбасары Теміржан Рамазанов айтты, деп хабарлайды KYN.KZ ақпарат агенттігі Polisia.kz. сайтына сілтеме жасап.

Астана әуежайындағы желілік полиция басқармасына елорданың 41 жастағы тұрғыны жүгінгін. Ол Чунцин - Бейжің - Астана бағыты бойынша ұшып келгеннен кейін 3 600 доллары (шамамен 1,6 миллион теңге) жоғалғанын хабарлаған.

Көлік полициясының қызметкерлері жедел-іздестіру шараларын жүргізіп, күдіктінің жеке басын анықтады. Ол арызданушымен бір рейсте, оның артындағы орында отырған шетел азаматы болып шықты.

"Күдікті елорда қонақүйлерінің бірінде ұсталды. Тінту барысында одан түрлі валютадағы ақша қаражаты, оның ішінде ұрланған 3600 АҚШ доллары толық көлемде тәркіленді. Ұсталған азамат кінәсін мойындады", - деді Теміржан Рамазанов.

Полицияның мәліметінше, барлық 3 600 доллар заңды иесіне қайтарылды. Жолаушы қызметкерлерге жедел әрекет еткені және көрсеткен көмегі үшін алғыс айтты.

Қазір күдікті қамауға алынды, оқиға дерегі бойынша сотқа дейінгі тергеу амалдары жүргізіліп отыр.

Сондай-ақ көлік полициясы бұған дейін осыған ұқсас құқық бұзушылық жасады деген күдікпен екі шетелдік ұсталғанын хабарлады. Олардың ісі сотта қаралып жатыр.

Құқық қорғау органдары жолаушыларға әуе сапары кезінде жеке заттары мен ақшаға мұқият болуды ескертеді. Мүлік жоғалған жағдайда дереу полицияға хабарласу керек.