Бүгіннен бастап банкроттыққа өтінім қабылдау басталады

автор kyn.kz
3 наурыз, 2023
314

Бүгіннен бастап банкроттыққа өтінім қабылдау басталады, деп хабарлайды KYN.KZ тілшісі ҚазАқпарат -қа сілтеме жасап. "Ұлттық ақпараттық технологиялар" АҚ қоғамдық кеңесінің хабарлауынша, банкроттыққа өтінішті борышкердің өзі ғана бере алады.

Өтініш берер алдында борышкер алдымен мына мәліметтерді тексеруі керек:

банктер, микроқаржы ұйымдары, коллекторлық агенттіктер алдындағы берешек 5,5 млн теңгеден аспауы тиіс және мерзімі кемінде 12 ай болуы керек;
ортақ меншікті мүлікті қоса алғанда мүліктің меншік құқығында болмауы;
банктің немесе микроқаржы ұйымының шарт талаптарын өзгертуден бас тарту туралы жауабын ұсыну (банктің немесе микроқаржы ұйымының жауабы болмаған жағдайда борышкер өтінішінің көшірмесі немесе өтініштің электрондық форматта жіберілгені туралы растама);
егер қарыз 5 жылдан артық өтелмесе – жоғарыда аталған барлық шарттар ескерілмейді;
АӘК алушылары саналатын борышкерлер 6 ай бойы осы рәсімді қолдану үшін мерзімі өтіп кеткен уақытты есепке алмай өтініш бере алады;
мобильді азаматтар базасында (МАБ) борышкер мен жұбайының телефон нөмірінің тіркелгенін тексеру керек. Ұялы нөмірді тіркеу үшін сілтеме бойынша өту керек – my.egov.kz.

"Құрметті пайдаланушылар, eGov.kz порталында және Халыққа қызмет көрсету орталығында барлық қажетті құжаттарсыз өтініш берудің мәні жоқ, ең алдымен екінші деңгейлі банктерден қажетті растауларды алыңыздар. Осыдан кейін ғана жеке тұлғаның банкроттығына өтініш беруге болады", – деп атап өтті "Ұлттық ақпараттық технологиялар" АҚ Басқарма төрағасы Ростислав Коняшкин.

EGov.kz порталындағы жаңа қызметті порталдың басты бетінде және "Азаматтарға" – "Кеден және салықтар" – "Экономика және қаржы" бөлімінен табуға болады. Аналогиялық қызмет eGov Mobile мобильді қосымшасының "Арнайы қызметтер" бөлімінде қолжетімді.

Соттан тыс банкроттыққа өтініш беру үшін:

Қазақстан Республикасының жоғарыда аталған Заңында көзделген азаматты банкрот деп тану туралы соттан тыс арыз беру шарттарының сақталуын растау;
некеде болу жағдайында жарының ЖСН-ін көрсету;
несиелер бар қаржы институттары туралы мәліметтерді толтыру;
салық органын көрсету және құжаттардың көшірмелерін қосу;
АӘК алушы болса, белгі қою;
егер міндеттемелерді орындау мерзімі 5 жылдан астам болса, белгі қою;
өтінішке бір реттік құпия сөз немесе ЭЦҚ арқылы қол қою;
өтінішті жібергеннен кейін өтініш берушінің жары Жеке кабинетте өтінішті мақұлдауы қажет.

Қызмет нәтижесі 15 жұмыс күні ішінде Жеке кабинетте шешімге сілтеме түрінде болады. Шешімді Қаржы министрлігінің сайтынан қарауға болады. Соттан тыс банкроттық рәсімі 6 айға дейін созылады.

Сонымен қатар, аталмыш қызмет банкроттық туралы соттан тыс іс жүргізуді тоқтату туралы өтініш беруді қарастырады. Рәсім пайдаланушы туралы ақпарат жарияланған күннен бастап 6 айда қарастырылады.

Банкроттық туралы заң қалай іске асады? 2022 жылдың 30 желтоқсанында «Қазақстан Республикасы азаматтарының төлем қабілеттілігін қалпына келтіру және банкроттығы туралы» Заңға қол қойылды. Заң 1 қаңтарда ресми түрде жарияланды. Заң жобасын әзірлеу барысында жеке тұлғалардың банкроттығы институты қалыптасқан елдердің тәжірибесі сараланып, тиісті нормалар алынды. Қаржы нарығын реттеу және дамыту агенттігінің мәліметінше, былтырғы жылдың қорытындысы бойынша қазақстандықтардың несие қарызы 14 трлн теңгеге жеткен. Соның ішінде тұтынушылық несиенің көлемі – 8 трлн теңгені құраған. Мемлекеттік кірістер комитетінің хабарлауынша, 1,5 млн адам қаржы институты алдындағы қарызын төлей алмай жүргеніне 90 күннен асып кеткен. Бір басында бірнеше несиесі барлар да жетерлік. Яғни, азаматтардың төлем қабілетінің нашарлауы аталған шараға жүгінуге мәжбүр етті деген қорытындыға келуге болады. Заң жобасын әзірлеу барысында жеке тұлғалардың банкроттығы институты қалыптасқан елдердің тәжірибесі сараланып, тиісті нормалар алынғанын атап өттік. Осылайша, рәсімдердің 3 түрі енгізілді. Олар – соттан тыс банкроттық, сот арқылы банкроттық және төлем қабілеттілігін қалпына келтіру. Аталған рәсімдерге тек қарыз алушының өзі бастамашы бола алады, яғни кредитордың борышкерді банкрот деп жариялау жайлы өтініш беруге құқығы болмайды.