Балалардың анасы үйде бала бағып, мал қарап тіршілік жасаған. Ал әкесі "Қазығұл" жекеменшік ауруханасында жедел  жәрдем көлігін жүргізеді екен. Қайғылы жағдай болған кезде 8 жастағы егіздер мен олардың 3 және 2 жастағы інілері үйде қалған.  

Облыс әкімдігінің мәліметіне сүйенсек, 25 қазанда сағат 10:49-да Төтенше жағдайлар басқармасының күштері мен құралдарын жедел басқару орталығының пультіне Аягөз қаласындағы жеке үйлердің бірінде түтін шыққандығы туралы хабарлама келіп түскен, деп жазды  KYN.KZ. тілшісі.

6 адамнан тұратын құтқарушылар бригадасы дереу сол жерге жіберілген. Оқиға орнына жеткен өрт сөндірушілер бөлмелердің бірінде 20 шаршы метр аумақта жиһаздар мен жеке заттар жанып жатқанын анықтаған. Өрт сағат 11:10-да оқшауланып, 11:24-те толық сөндірілген. Өртті сөндіру кезінде оқиға орнынан төрт баланың денесі табылған. Әкімдік қазіргі таңда тиісті сараптама тағайындалып, балалардың өліміне не себеп болғаны, сондай-ақ өрттің неден шыққаны анықталып жатқанын атап өтті. "Отбасы мүшелеріне барлық қажетті көмек көрсетілуде. Жағдай жергілікті атқару органдарының бақылауында", - деп хабардар етті облыс әкімдігінен.

Abai News Telegram-арнасының мәліметінше, көз жұмған балалар – бір отбасының балалары. Олар – 8 жасар егіз бен олардың 3 жас пен 2 жастағы інілері. "Балалардың әкесі жедел жәрдем жүргізушісі болып жұмыс істейді және оқиға кезінде жұмыста болған, ал анасы азық-түлік әкелуге базарға кеткен", - делінген жазбада.